Sekula Primari (SK) Nanga Kesit patut dibekal elekterik ari grid
KUCHING: Menteri Muda Pemansang Industri enggau Beranakka Puku, Malcom Mussen dekaka SK Nanga Kesit, Lubok Antu disambung ngagai grid elekterik dikena mutarka penanggul bekal elekterik ke ditapi sekula nya.
Ba penemuai kereja ke sekula nya kena Hari Empat tu tadi, Mussen ngasuh SK Nanga Kesit ngenataika pinta disambung ngagai grid elekterik nengah Gerempung Apai Indai enggau Nembiak (PIBG).
Nitihka rikod, kabel grid elekterik urung 500 meter penyauh ari sekula.
Mussen ke mega Kaban Kunsil Nengeri ( ADUN) Batang Ai madah, ungkus nyambung sekula elekterik nya ngagai grid elekterik deka ngena geran Projek Mit Menua Pesisir ( MRP).
Ngenang kaul ke sama, iya madah deka nyendia ‘ portable genset’ ngagai sekula nya ti bisi 159 nembiak enggau 21 iku pengajar sereta staff.
Injin api nya deka nyendia bekal elektrik sementara ngagai SK Nanga Kesit lalu deka datai dalam awak ke semak tu.
Kena ujung bulan Julai tu tadi, SK Nanga Kesit putus bekal elekterik pengudah kededua injin api sekula nya rusak.
Pekara nya ngujungka nembiak sekula nya belajar dalam bilik kelas ke angat.
Nambahka pemerinsa, bekal ai ngagai sekula nya mega teputus ketegal ai ari tangki semina ulih dipam ngena kuasa elekterik.
SK Nanga Kesit sigi nadai bekal kuasa elekterik ari grid elekterik, lalu ngelama ke udah bepanggai ba injin api dikena ngulihka kuasa elekterik.
Dulu agi ari tu SK Nanga Kesit bisi 2 iti injn api, iya nya siti dikena maya hari siang ungkup timpuh 12 jam lalu siti agi dikena maya malam ungkup timpuh 12 jam mega.
Siti ari injin api rusak ba taun 2017 lalu mengkang enda dikemanah nyentuk ke sehari tu ke alai nya ngujungka siti ke manah dikena pengelama 16 jam ninting hari.
Kena 22 Julai, injin api ke dikearap nya rusak lalu nya mih pun pemar enggau pemerinsa ke ditapi nembiak enggau pengajar SK Nanga Kesit.