Ng: Kuching Marathon 2018 deka dipejalaika enggau likun

KUCHING: Polis DiRaja Malaysia (PDRM) ngenukuka program belanda betikas antarabansa iya nya Kuching Marathon 2018 dipejalaika enggau penuh pemaik sereta likun.

Ketuai Polis Pelilih Menua Kuching Asisten Komisioner Ng Ah Lek madah, nya berindik ari sida iya ti udah berati sereta nasat bekaul enggau pengelikun.

“Kitai bisi pemesai Pampang Khas sereta udah berati sereta kitai udah bejalaika pengawa nasat enggau betanya chara belalai enggau ke bukai, nya alai naka ke diatu nadai pekara ti ngeruga atur program tu, dipejalaika baka ti udah dilanggur enggau ditimpuh.

“Kami (PDRM) nyendiaka urung 100 iku pemesai sereta raban nyengkaum trafik enggau polis soldadu ke nyaga ba batiap endur. Nambahka nya bisi 100 iku raban RELA nulung kitai.

“Nya alai kitai ngasaika udah chukup anggota penyaga pengelikun ngemataka program besai ngambika ulih diatur enggau penuh likun, pemaik sereta pengelantang,” ku iya.

Ng mansutka pekara nya dalam aum pengarang berita Kuching Marathon 2018 ke diatur ba Indu Opis Polis Pelilih Menua Kuching ditu, kemari.

Kuching Marathon ti kali kelima diatur, lalu ba taun tu deka diatur kena 12 Ogos ti dibagi ngagai empat kategori iya nya Full Marathon ( 42KM), Half Marathon (21KM) sereta fun run 10 KM enggau 5KM.

Berebak enggau tu Ng madahka berindik ari mayuh pesereta ari menua luar,polis mega bisi nyaga pengelikun nyengkaum ba hotel.

“Kami mega deka ngenukuka pengelikun ba hotel, dikena nentu nama Malaysia kelebih agi nama Kuching manah,” ku iya.

Sama bisi datai ba aum pengarang berita nya kemari Sekretari Serakup Marathon Kuching (KMA) Liew Tang Chieh enggau ke bukai.