Jematan Batang Samarahan udah ulih ditengah penguna
SAMARAHAN: Jematan Batang Samarahan nyadi penyambung jalai tebing tasik ke besemak lalu mai pemaik ngagai peranak di menua pesisir.
Kelimpah ari nya, Menteri Muda Jalai Tebing Tasik Datuk Julaihi Narawi netapka jematan mega nyadi penyambung genturung pendiau di menua pesisir kelebih ke ba sepemanjai tebing tasik.
“Kitai ngasaika Jematan Batang Samarahan deka nyadi sebengkah jematan ke beguna kelebih agi nyadi penyambung jalai tebing tasik.
“Jematan tu nyendia perengka guna ke manah lalu ungkup pemaik rayat di menua pesisir,” ku iya.
Julaihi mansutka jaku nya ngagai pemberita pengudah bejadi ‘lurung trafik’ Jematan Batang Samarahan ditu, kemari.
Jematan ke nyambung Kota Samarahan ngagai Asajaya ba pemanjai 774 meter nya udah tau ditengah mensia mayuh berengkah kemari.
Julaihi pechaya Jematan Batang Samarahan deka nyaup atur ngemansang kandang menua pesisir kelebih agi ke ba sepemanjai tebing tasik.
Ku iya, jematan mega deka ngangkatka tikas sosio ekonomi rayat di menua pesisir.
Ngenang kaul ke sama, Julaihi madah pengawa nyendia perengka guna baka ke jematan enggau jalai alun di nengeri tu deka digaga belama.
“Tu meh pekara ke dikemerat kitai, kelimpah nyendia perengka guna ba kandang mengeri, kitai mega keran nyendia perengka guna ke sama di menua pesisir.
“Ngaga jalai alun sereta jematan ke nyadi penyambung deka ngelengkas pengawa pemansang di nengeri tu,” ku Julaihi.
Jematan Batang Samarahan digaga ngena belanja RM110 juta lalu disadang mai pemaik ngagai urung 70,000 peranak Asajaya.
Pejalai ke Mengeri Kuching betengah jematan nya ulih dipandak ngagai 30 minit enti dibanding enggau nepan feri.
Bela datai Kaban Kunsil Nengeri ( ADUN) Sadong Jaya Aidel Lariwoo enggau Kaban Parlimen (MP) Kota Samarahan Rubiah Wang.