Tumbuhka sekula vokasional ‘khas’ ungkup nembiak OKU di nengeri tu
KUCHING: Sebuah institusyen tauka sekula vokasional ‘khas’ ungkup nembiak nyelai pendiau (OKU) patut ditumbuhka di nengeri tu.
Menteri Pengintu Pengelantang, Komuniti, Orang Indu, Ruang Bilik enggau Pemansang Nembiak Dato Sri Fatimah Abdullah madah sekula nya diguna endur matih nembiak OKU ngambi ulih ngidupka diri.
“Naka ke diatu, Sarawak enggau Sabah bedau bisi vokasional ‘ khas’ ungkup nembiak OKU ke alai sida meseti ke Semenanjung Malaysia enti deka nampung pelajar pengudah tembu sekula sekondari.
“Tang enda mayuh apai indai sanggup beserara enggau anak sida lalu kitai ngasai vokasional khas meseti ditumbuhka di Sarawak.
“Berindik enggau nya, kitai ngarap Perintah Besai ulih berundingka pinta Sarawak numbuhka sekula vokasional tu ungkup nembiak OKU kitai,” ku iya.
Iya mansutka jaku nya lebuh dikerandau pengarang berita ba program ‘Ziarah Ramadan’ ba tiga buah rumah klien Opis Pengintu Pengelantang Mensia Mayuh (JKM) ditu.
Fatimah nambah, dikena ngangkatka kualiti servis enggau pengidup anak OKU, pekara ke bekait enggau pengelandik sereta pelajar meseti dikemerat.
Nembiak OKU ku iya enda ulih kelalu bepanggai ba bala apai indai, menyadi tauka ruang bilik bukai ninting maya.
“Kelimpah mulaika pengerai, pekara pelajar enggau latih pengelandik mega beguna amat ungkup bala nembiak OKU.
“Enti bala ruang bilik sida udah nadai agi jemah, kinika tunga sida,” ku Fatimah nandu.
Ngenang kaul ke sama, Fatimah madah semua klien JKM deka nerima bantu musin pengerami ba penyampau RM100.
Reti nya, enti sida nerima bantu RM300 ninting bulan, penyampau nya ditiki ngagai RM400.
Bantu nya Ku Fatimah deka dipasuk ngagai akaun penerima sebedau Hari Raya lalu pia mega ngagai penerima ke ngintu Hari Gawai kena 1 Jun tu.