Rayat Sarawak deka ngasaika pengelantang ari manifesto PH
KUCHING: Rayat Sarawak deka bulih penguntung enggau pengelantang ari manifesto Pakatan Harapan ke nyadi perintah baru ti ngiring menua.
Kaban Parlimen Bandar Kuching, Kelvin Yii Lee Wuen madahka diri arap bendar perintah baru ulih ngamatka semaya tauka manifesto ke deka dipejalaika 100 hari sereta dalam timpuh setaun ungkup manifesto PH Sarawak.
Iya madahka mayuh pemanah sereta penguntung ari manifesto PH nyengkaum senentang royalti minyak, GST diketuka enggau ke bukai.
“Ngagai kitai orang nengeri tu nengah pengawa magi royalti minyak ngagai nengeri Sarawak, aku ngarapka kitai ulih ngemansangka nengeri enggau chakah agi lalu enda bepanggai tauka nganti perintah besai. Kitai mayuh asil dikena ngemansangka nengeri diri.
“Rayat Sarawak mega deka nerima empas terus ari dividen petrol ke disemayaka kami. Reti iya pengeraja asal nyengkaum petroleum dikeempu rayat ukai perintah,” ku iya.
Kelvin meri penerang iya lebih dipinta ngenang pasal manifesto PH ke deka dipe- jalaika pengudah mujur nyadi perintah besai ke baru.
Ngenang semaya 100 hari pasal ungkus pengidup, ngetuka GST, ulih nyaga rega barang sereta ke bukai ku iya, ukai semina meri penguntung ngagai peranak dalam parlimen Bandar Kuching tang mungkur semua rayat.
Semaya 100 hari ku iya, mega deka bejalaika pansik ngagai skandaal duit ke nyadi ba serata menua sereta ngambi pulai baru duit ti endang ungkup rayat.
Kelvin ari Parti Tindakan Demokratik (DAP) teulihka undi 48,548 undi enggau menang majoriti 35,973 undi ngalahka chalun BN Kho Teck Wan semina teulihka 12,575 undi, ba PRU 14.
“Aku enggau baruh ati sereta temegah ati diberi mandat enggau dipechaya peranak Bandar Kuching lalu aku deka gawa bebendar nentuka hak sida dijaga enggau polisi ke dipejalaika meri pemanah ngagai sida,” ku iya madah ngagai Utusan Borneo.