PBB nadai ngatur sebarang randau enggau PH: Karim
SIBU: Parti Pesaka Bumiputera Bersatu (PBB) nadai ngatur sebarang randau enggau Pakatan Harapan (PH) sekalika di renggat nengeri tauka perintah besai.
Menteri Dagang Temuai, Seni, Main Asal, Nembiak enggau Lumba, Datuk Abdul Karim Rahman Hamzah nerangka PBB iya nya parti ti ditempa meruan udah mutarka mayuh pemar kandang 50 taun ke udah.
Ku iya nambah, PBB enggau kaban gempung nengeri iya, datai ari Parti Sa’ati Rayat Sarawak (SUPP), Parti Rakyat Sarawak (PRS), enggau Parti Demokratik Progresif (PDP) iya nya perintah ke bisi di Sarawak diatu, seraya DAP/ PKR ti nyadi PH nengeri nyadi kem penyakal.
Nya alai, kes gempung parti merintah Sarawak nyemilik PH semina berita selebubu ngapa, ku Abdul Karim nyemetak.
“Chairman PH Sarawak Chong Chieng Jen enggau Chairman Parti Keadilan Rakyat (PKR) nengeri, Baru Bian patut anang kelalu jampat nyimpulka penemu sereta abis ati. Aku geli ati ari penyampat YB Chong, chairman DAP Sarawak sereta mega YB Baru Bian, chairman PKR Sarawak nulak sebarang penguji nerima sebarang raban dalam gempung BN Sarawak kelebih agi PBB ke dalam PH.
“Chong mega udah mantaika penemu nerima raban baka PBB sebaka enggau nerima UMNO nyengulai PH. Aku deka ngingatka Chong enggau Baru Bian – PBB nadai ngatur sebarang randau begulai enggau PH sekalika di renggat nengeri tauka perintah besai. PBB enggau kaban gempung nengeri iya SUPP, PRS, enggau PDP iya nya perintah ke diatu di Sarawak lalu DAP/ PKR nengeri ti datai ari PH nengeri nyadi penyakal.
“PBB iya nya parti ditempa meruan, udah mujur napi penanggul enggau penekul kenyau ari 50 taun ke udah lalu deka ulih bediri teguh sebarang pemar baru. Pia mega, PBB bebasaka hak demokrasyen peranak Malaysia, kelebih agi di Semenanjung Malaysia, ti dekaka ubah ngagai perintah ke bisi diatu,” ku Kaban Kunsil Nengeri (ADUN) Asajaya madah ngagai thesundaypost kemari.
Abdul Karim nimbal penerang dipansutka Chong enggau Baru ti nulak PBB tauka sebarang parti komponen BN Sarawak nyemilik PH.
Chong udah madamka penemu ke alai BN Sarawak benung berandau enggau Menteri Besai Tun Dr Mahathir Mohamad ti ngarap deka nyemilik PH.
Chong udah besumpah ke alai penetap PH Sarawak, sida enda deka nerima sebarang parti BN Sarawak, nyengkaum PBB.
Seraya Baru, nyemetak madahka bala ketuai PH Sarawak udah begempung nulak PBB tauka sebarang parti komponen BN Sarawak nyemilik PH.
Nitih ku Baru, ngalihari Hari Lima, iya udah nganjung pinta ngagai presiden parti sida, Dato’ Seri Dr Wan Azizah Wan Ismail enggau Sekretari PH Datuk Saifuddin Abdullah ngambi beratika sida nulak pengawa nerima sebarang parti BN ke dalam PH.
Kaban Parlimen ( MP) Selangau ke baru dipilih udah ngumbai PBB, ngemai pangka, pengari UMNO di Sarawak, lalu bala ketuai sida udah disangkung salah guna kuasa ngulihka pengaya, ngerampas hak rayat.
Abdul Karim madahka dalam sistem demokrasyen parlimen, jarang meda perintah nengeri enggau perintah besai dipegai parti ti bebida.
Tang udah dipeda sebedau Pengawa Bepilih Besai Ke14 (PRU14) ke alai nengeri Selangor, Penang enggau Kelantan diperintah parti ti ukai megai Perintah Besai, ku iya.
Taja pia, taja bisi bida, iya diperati meruan amat ngagai perintah besai enggau nengeri ngembuan sekeda tikas kerejasama dalam mayuh bidang, ku iya berati.
Tambah mega, nitih ku mandal presiden PBB, kededua perintah diundi sereta diberi mandat ari rayat lalu kededua perintah meseti anang lenyau tanggungpengawa sida ngagai rayat.
“Tu ukai dikena Chong enggau Baru madah ngagai rayat ke alai PH patut anang bekerejasama enggau perintah nengeri laban tu semina deka ngayanka pemadu runding enggau pengawa ditegi dalam politik, ungkup menua enggau rayat sida.
“Kes parti gempung merintah Sarawak deka nyemilik PH nya semina berita selebubu ngapa aja. BN nengeri enda deka ngerusak pemenang sida. Mayuh agi berasai lantang. Tang meseti dikeingat, kededua seduai bela pengari rayat ti dipilih, naka ulih gawaka rayat ti udah milih seduai.
“Rayat ti ngundi seduai mega rayat ti sama ngundi gempung perintah nengeri. Sida dekaka pengari ti bisi tanggungpengawa, lurus, adil enggau sebela, sereta mega nitihka atur undangundang. Tu seruran dikemeran dalam agenda bakih gempung perintah BN lalu enti tu mega agenda Perintah Besai PH, beberapa tikas kerejasama nyangka agi ulih diatur. Chong enggau Baru meseti ingat pengawa ditegika sida lalu ngaul diri dalam politik ukai agenda diri empu tang ungkup nengeri enggau menua,” ku Abdul Karim nandu.