Anyi deka bebendar gawa nentu BN menang di Baram

MIRI: Chalun Barisan Nasional (BN) di Baram, Anyi Ngau madahka diri deka bebendar agi gawa begulai enggau semua raban nembiak BN di Baram nentuka BN menang maya pengawa bepilih 9 Mei tu.

Anyi besemaya iya enggau tiga kaban kunsil nengeri (ADUN) ke bukai di Baram iya nya Datuk Gerawat Gala (Mulu), Datu Dr. Penguang Manggil (Marudi) enggau Dennis Ngau (Telang Usan) deka gawa begulai enggau sida dikena nyapai tagit deka ngetanka penuduk ungkup BN lalu seruran gawa begulai ungkup Baram menyana agi jemah.

“Kitai deka nyingkang enggau sida (raban nembiak) lalu tu semaya aku. Kitai deka ngaga sebarang pengawa ti ulih dikereja kitai nentuka raban nembiak bejalaika pangku pengawa besai amat sereta mega nentuka Baram menang,” ku iya lebuh bejadika raban gawaka pengawa bepilih Raban Nembiak BN Baram di Eastwood Valley Golf and Country Club ditu, malam Hari Minggu.

Anyi, ti ngiga penggal kedua nyadi Kaban Parlimen (MP) ba penuduk nya madahka iya beterima kasih ke sukung ari bala kaban BN nyengkaum raban nembiak BN di Baram.

Semangat diayanka raban nembiak, ku iya, udah meri peransang ngagai iya ransing agi gawa nentuka BN menang di penuduk Baram.

“Semangat ari raban nembiak nyadi siti ari pengelebih kitai dalam BN. Ba BN, bisi konsep inklusif ke alai nyengkaum semua orang nadai ngira umur lalu kitai meda malam tu enggau chura biru,” ku iya ti nerima tempap jari ari nyauka 500 iku sida ke bisi datai malam nya.

Seraya tiga ADUN di Baram, Gerawat, Penguang enggau Dennis ba jaku dipansutka sida minta sukung tegut agi lalu menang penuduk nya enggau majoriti besai agi nentuka Baram kering jaku ba parlimen.

Dulu ari nya, Chairman Pengatur, Dominic Nyurang ba jaku ngelalu iya madahka Anyi ke alai Raban Nembiak BN Baram udah sedia gawa nentuka BN enggau Anyi menang.