DAM ngatur pekit kumang/keling Miri kena 19 Mei
MIRI : Pekit Dayung Sangon, Kumang Iban, Keligit Orang Ulu enggau Keling/Belawan Gawai 2018 ke Pelilih Menua Miri deka diatur kena 19 Mei, lalu pengatur program tu ngangau semua sida ke bisi ati tauka pengulih enggau masuk pekit tu.
Pekit tu dibagi ngagai empat kategori, iya nya Dayung Sangon; Kumang Iban; Keligit Orang Ulu enggau Keling Iban/Belawan Orang Ulu.
Ke kategori Dayung Sangon, Kumang Iban enggau Keligit Orang Ulu, penyereta meseti indu ke agi dara berumur entara 18 ngagai 25 taun, lalu ke kategori Keling/ Belawan dibuka ngagai lelaki ke agi bujang berumur entara 18 ngagai 30 taun.
Sida ke udah belaki tauka bebini, sarak, indai tauka apai tunggal enda ulih enggau masuk pekit tu.
Ba pekara ke sebaka nya mega, Dayak Islam ke bisi ati deka enggau pekit tu enda tau enda minta pemendar betulis ari Opis Agama Islam (JAIS) nyengkaum ari apai indai sida iya.
Penyereta enda tau enda pandai bejaku dalam jaku etnik ke di ari sida iya, lalu enda tau enda dalam peninggi pengabis kurang, 150cm tauka 5 kaki peninggi.
Sida ke datai ari ruang bilik bechampur bansa, alai nama sida iya ngena nama dalam Jaku China, India tauka Eurasian, sida iya enda tau enda nyereta sekali pom rejista sida iya enggau surat beranak, ngambika ulih dikemendarka.
Pom ke udah tembu diisi enda tau enda diseretaka sekali enggau pom rejista RM30, siti salin MyKad enggau surat beranak penyereta (ke datai ari ruang bilik bechampur bansa) sereta dua iti gambar sais pasport, enda tau enda datai ba opis orang ke ngatur program tu, iya nya Gerempung Dayak Miri (DAM) ba Lut 1088-1089, Ringkat 3, Rumah Gerempung Dayak Miri, Jalai Merpati sebedau tauka ba haribulan ke penudi, iya nya kena 4 Mei sebedau tauka dalam pukul 4: 30 lemai.
Penyereta ke udah netapka enggau pekit tu diasuh ngenataika diri ba pengawa milih penyereta ke renggat penudi (final), kena 12 Mei, di Bintang Megamall, alai bala indu kumang tu deka diasuh ngena gari Nyonya Kebaya, lalu sida ke lelaki ngena baju batik lengan panjai enggau tanchut panjai.
Semina enam iku finalis deka dipilih ke tetiap kategori maya milih penyereta lalu finalis tu deka bepekit ba renggat penudi, ke deka digaga beserimbai enggau pengawa Makai Lemai Gawai Dayak Pelilih Menua Miri di Hotel Meritz kena 19 Mei tu ila.
Champian ke kategori Dayung Sangon, Kumang Iban enggau Keligit Orang Ulu deka diberi perais mata wang RM1,200, lalu ke penuduk kedua enggau ketiga deka mai pulai RM900 enggau RM700 siku-siku.
Ketiga- tiga pemenang dalam kategori tu mega deka nerima trofi, bungai, siti hamper sereta setipikit. Finalis ke bukai sama deka diberi perais saguhati, iya nya mata wang RM400, siti hamper enggau setipikit, siku.
Ke kategori Keling Iban/ Belawan Orang Ulu, champian deka nerima mata wang RM1,000 cash, lalu ba penuduk lumur dua enggau ketiga, pemenang deka mai pulai mata wang RM800 enggau RM700 siku. Ke semua ketiga-tiga pemenang mega bela deka nerima trofi.
Finalis dalam kategori tu mega deka diberi mata wang RM400 siku, lalu keenam finalis deka nerima hamper enggau setipikit.
Mensia mayuh ke deka nemu pasal pekit tu enggau silik agi, tau betanya ba Venezia Doning (016-8611629) tauka Nancy Roba Ribid ( 0168005889) ke kategori Dayung Sangon; Kitty Janggot (Opis Rumah Dayak ba lumur 085435467); Angela Bugak (0138471889) tauka Betty Pan (010-9831231) ke kategori Kumang enggau Keling Iban sereta Loretta Herbert Madang (019-8360333) enggau Petrus Lasong (010-7728084) ke kategori Keligit enggau Belawan Orang Ulu.