Dr Sim andal raban China deka ngundi BN ba PRU14
SIBU: Presiden Parti Sa’ati Rayat Sarawak (SUPP) Datuk Dr Sim Kui Hian chukup andal bansa China deka ngundi Barisan Nasional (BN) maya Pengawa Bepilih Besai Ke-14 (PRU14).
Iya madah, sukung tu dikena ngemuntangka agi pengawa ngambi pulai hak ba Sempekat Malaysia 1963 (MA63) nangkan ke tu ila.
“Kitai ditu anang ngira politik ke nyadi di Semenanjung Malaysia.
“Ke batang pemerat, kitai ngira diri empu ditu aja laban undi kitai nyengkaum bansa China beguna endar dikena nentuka nengeri tu mansang,” pia ku iya madah.
Iya mantaika jaku tu maya Program Harmony Nite ‘United We Stand’ ba Sibu Gateway ditu, malam kilah ensana.
Program tu dipenyadi Kepala Menteri Datuk Patinggi Abang Johari Tun Openg.
Bela datai maya tu iya nya bini Abang Johari Datin Patinggi Dato Juma’ani Tuanku Bujang, Menteri Dagang Antarabansa enggau E-Dagang Dato Sri Wong Soon Koh, enggau bini iya, Datin Sri Pauline Leong enggau Sapit Ketuai Direkter Opis Pemadah Dato Mohd Sukari Ab Hamid.
Dr Sim madah, enti BN bisi kuasa, dia pengawa ngatur pemansang deka lantang agi.
Semua tu ku iya dikena ngira pengelantang pengidup rayat kelebih agi rebak dudi ila.
“Penguntung ke diulih Petronas disadung serata menua tu.
“Taja nengeri kitai kaya enggau minyak sereta gis tang sekula enggau sepital kitai pemadu merinsa.
“Nya alai, PRU14 tu besai guna ngambika kitai deka bulih baru hak tu,” ku iya nandu baru.
Dr Sim madah, perintah BN nengeri ngelama tu semampai ngemeratka pengelantang pengidup raban bansa China.
Ketegal nya ku iya, perintah nengeri udah mayuh ngungkupka agih tauka geran ngagai sekula China ba ditu.
“Enti kitai meda ba Pulau Pinang enggau Selangor bisi perintah nengeri nya baka perintah nengeri kitai?,”
“Ngarapka rayat lebih agi bansa China meri sukung ngagai BN ba PRU serak tu,” pia ku iya madah.