Nanta muji program nanam getah RISDA ungkup peranak Kapit enggau Song
KAPIT: Sapit Menteri Pemansang Menua Pesisir enggau Kandang Menua (KKLW), Datuk Alexander Nanta Linggi udah bejadika pengerami makai lemai dikena ngelai pengawa nutup program ‘ Kasihi Pekebun RISDA Negeri Sarawak’ enggau Seminar Sosio-Ekonomi ungkup Bala Ketuai Komuniti diatur begulai Opis Pemansang Orang Betanam Getah Kebun Mit (RISDA) enggau Opis Pelilih Song di Pelilih Song, diatur di Balai Komuniti Song, ditu minggu siti nyin tadi.
Bejaku ba pengerami nya, Nanta muji RISDA ti ngepunka program nanam getah asil tinggi ungkup peranak di Kapit, nyengkaum Song.
“Program tu udah lama dipun di kandang menua bukai. Kapit tinggal di belakang laban bisi penanggul ba tanah, berindik ari tanah Hak Adat Bansa Asal (NCR) nadai pala tanah lalu bisi penanggul ketegal betalatka pengempu tanah. Nya kebuah RISDA enda ulih bejalaika program nya ditu.
“Taja pia, tanah NCR udah disengkaum di baruh sukat kelingi lalu pengawa tu nyaup RISDA bejalaika program nya ditu. Tang kita meseti gawa bebendar nentuka pemujur program tu,” ku Nanta.
Iya minta rayat nerima penemu baru lalu ngubah runding sida.
“Taja kita bisi tanah tang enti kita nejuka iya pia aja, nadai ulih ngemansutka belanja. RISDA enggau bantu Opis Betanam Betupi udah ngepunka pengawa nanam getah asil tinggi lalu betanamka getah deka mantu nambahka rega tanah kita.
“Pun getah nyadi reta lalu mantu nambahka rega tanah. Taja kita enda nangkal tang perintah tauka sebarang raban bukai ti bisi ati begunaka tanah, kita deka nerima bayar pampas tanah manah agi,” ku Nanta madah nyemetak.
Pengudah nya Nanta bisi nyuaka surat chiri baru mangku pengawa enggau nampung pengawa ngagai bala ketuai komuniti di Pelilih Song sereta mega nyuaka geran ngagai sekeda Komiti Pemansang enggau Pengelikun Genturung Pendiau (JKKK) di baruh kandang menua dipegai Penghulu John Salang enggau Penghulu Sumping di kandang menua Katibas.
Ku Nanta, taja parlimen udah dipadam kena 7 April tu tadi, iya bisi kuasa meri geran dalam kapasiti iya nyadi Sapit Menteri ti gawa nyadi pengibun perintah sebedau tu ngagai pengawa bepilih besai.
Penatai Nanta rambau pengerami makai lemai nya disambut bala bujang berani Iban diketuai 20 iku kaban Kelab Gagung Sarawak.
Dulu agi ari nya, Nanta udah nyuaka setipikit ngagai pekebun mit getah RISDA di Pelilih Song.
Sama bisi datai Pemesai Pelilih Song Jackline Bte August, bala pemesai RISDA ari indu opis di Kuching enggau pampang Kapit, bala ketuai ari mayuh bengkah opis perintah sereta bala ketuai komuniti.