Manifesto PH manah agi ari umpan BN sereta semaya ke enda ditemu maya ka digaga
KUCHING: Dalam jaku penerang iya ensanus, Chairman, Parti Keadilan Rakyat ( PKR) Sarawak Baru Bian madahka pengawa ke digaga ulih Kepala Menteri ngemaruhka Manifesto Pakatan Harapan nyerumba latih iya nguingka senapang iya nuju Mahathir mandangka kurang penemu iya bekait enggau kaul sereta gempung PH.
Baru madah manifesto PH digaga ulih komiti pengereja pengawa sereta disetuju ulih keempat parti dalam PH, lalu iya ukai digaga ulih Dr Mahathir kediri aja.
“Meda Manifesto Barisan Nasional (BN) renggat nasional, terang endar pemula Najib enggau BN agi ngembuan manifesto sida iya penuh enggau danji. Dalam kandang berapa taun tu ke udah sida iya udah patut nembuka semaya sida iya lalu timpuh kediatu, sida iya patut bekimpin meda pemujur pengawa ke udah digaga BN.
“Tang enti diperati diatu, pengawa BN iya nya semaya sida iya deka nikika ungkup BR1M sereta ngumpan pengundi ngena duit baka elawin petrol sereta meri BR1M ngagai raban driba teksi bedau lama tu tadi, tang nadai sekali meri penerang pasal 1MDB sereta skandal makai suap tauka chara ngemutarka pengawa makai suap, ngambika dudi hari ila, pengawa salah tu dikemunaska,” ku Baru.
Baru ti mega nyadi Kaban Kunsil Nengeri (ADUN)Ba’kelalan madah enti Abang Johari nanya pengamat sida iya, sida iya ( PH) pan tau nanya pengamat Dato Sri Najib Tun Razak ngaga sereta nembuka semua danji sida iya dalam manifesto BN. Gaga semua danji nya, kelebih agi ngemanahka agi sekula ke udah jai tauka udah lama dalam kandang 5 taun, ku iya.
“Munyi ke suah endar ninga danji tu. ‘Bluprint’ Pelajar 2012 madahka ba pengujung taun 2013, urung 1,806 buah sekula di menua pesisir di Sabah enggau Sarawak ke udah jai tauka udah lama patut dibiki sereta digaga manah agi.
“Diatu udah taun 2018, lalu mayuh ari nembiak sekula kitai di menua pesisir agi duduk dalam kelas ba sekula ke udah jai. Lalu baka nya mega enggau danji meri ungkup ke munyi bebiliun ke deka diberi ulih Perintah BN dalam kandang berapa taun tu ke udah, pelaba aku Abang Johari pan nyau lelak mendingka danji nya lalu minta pemendar ari Najib ngena wang turu menua Sarawak dulu kena miki sekula lama tauka udah jai nya,” ku iya.
Ba senentang manifesto BN Sarawak, Baru nanya nama kebuah BN Sarawak nambah manifesto BN Sarawak, laban PRU14 ukai pengawa bepilih menua, baka menua bukai di Semenanjung Malaysia.
“Nyangka ketegal Abang Jo enggau BN Sarawak enda teulihka hak Sarawak ke chukup dalam manifesto BN renggat nasional? Dalam manifesto BN Nasional semina mantaika siti garis leka jaku: Hak Sabah enggau Sarawak baru Danji Malaysia 1963 deka dikeamatka nengah konsensus.
“Reti leka jaku ‘Nengah konsensus’ madahka nengah jurai sereta betawar. Enti dibandingka, manifesto PH renggat nasional, ngerintaika 9 pekara ngagai rayat Sabah enggau Sarawak nengah 5 tiang, enggau pemerat ‘Pulaika penuduk Sabah enggau Sarawak nitihka Danji Malaysia 1963’. Enda ibuh betawar tauka ngena konsensus - pemesai PH Nasional udah nemu sereta besetuju bebasaka hak, lalu bejanji deka ngangkatka pengelantang pendiau rayat menua tu,” ku iya.
Baru nandu baru madahka ketegal penuduk Sarawak ke nyadi deposit tetap BN, BN Sarawak enda ulih minta pekara ke berat ke rayat menua tu ari Perintah Besai BN.
“Ambika chunto Kunsil Nengeri semua udah besetuju ba resolusi dalam taun 2014, minta 20 persin royalti minyak enggau gis tang enda dikibuhka ulih Perintah Besai,” ku iya.
Dalam manifesto BN nasional, Sarawak enggau Sabah semina mimit aja disebut. Tu mandangka ba UMNO, Sarawak agi nyadi deposit tetap, tang enda mayuh ke diberi pulai baru ngagai Sarawak.
“Siti agi chunto, bekait enggau hak tanah adat (NCR) siti pekara ke berat ngagai rayat Sarawak tang pekara ke diberi ulih BN, iya nya nyukat tanah adat, tang nadai nyebut pasal meri kelala hak orang asal menua tu. Tang ba Perintah PH, enda bansa nya, laban Perintah PH deka ngamatka meri pulai sereta nyamin hak tanah rayat Sabah enggau Sarawak, lalu deka ngambi pemerat nya dalam semaya, beratika hak rayat dibasa sereta dipulaika.
“Enti Abang Johari deka mantaika pekara kelia tauka suba, kami pan tau nanya bakani ku pemerat BN Sarawak betatika pemerat rayat dalam kandang 22 taun maya Tun Dr Mahathir Mohamad nyadi menteri besai. Nadai sekali munyi ari Kepala Menteri (maya nya) tauka ari menteri BN bukai, lalu pekara nya semadi meh penyakal menang, baru BN Sarawak mutus deka angkat lalu ngarika rayat, minta hak rayat diperbasa,” ku iya.
Baru nandu baru, orang berubah. Dr Mahathir udah meda bakani ku Perintah Najib Razak tu kelalu balat makai suap sereta bejalaika Perintah kleptocratic, ke udah mai penusah ngagai ekonomi Malaysia sereta ngemaluka rayat Malaysia ba renggat entarabansa .
“Ketegal nya, Dr Mahathir begempung enggau penyakal, laban deka nagang menua tu rusak, lalu nambah enggau nya, laban iya beratika pemerat PH ke Malaysia, ulih mulai menua tu nengah jalai ke betul.
“Tang utai ke nyinuka ati, pekara manah baka tu enda ulih diserumbaka ba Kepala Menteri enggau BN Sarawak ke majak mutaka mata, sereta mengalka pending ba pengawa salah makai suap sereta skandal ti digaga ulih Najib enggau kroni UMNO, lalu majakka sukung sida iya buta baka nya,” ku iya. SIBU: Parti Tindakan Demokratik (DAP) Sarawak sekali agi ngandalka Paren Nyawi bediri tunga ke Batang Rajang maya pengawa bepilih serak tu. Paren, 37, kala bediri ba Kunsil Nengeri Katibas ngelaban chalun Barisan Nasional (BN) Datuk Ambrose Blikau maya Pengawa Bepilih Nengeri (PRN) sebedau tu.
Ba Pengawa Bepilih Besai Ke-14 (PRU14) tu iya disabung ngelaban chalun BN ba penuduk Parlimen Kapit.
Maya PRN suba iya bulih 1,628 iti undi tang alah laban Blikau ti bulih 4,681 undi enggau majoriti 3,053.
Nama Paren tu dibantaika Chairman DAP Sarawak Chong Chieng Jen maya Pengerami Makai Malam Be- serimbai Enggau Penumubuh Ke-40 DAP Sarawak ba ditu, kilah ensana.
Kelimpah ari Paren, chalun DAP Sarawak ungkup sitak tengah ke bukai bela dipadahka nama maya tu.
Sida tu agi baka nama suba iya nya Alice Lau bediri ba Parlimen Lanang, Oscar Ling (Sibu) enggau Wong Ling Biu (Sarikei).
Ba jaku iya, Chong madahka DAP Sarawak andal amat sida empat tu deka bulih pemujur bediri ba sitak tengah maya PRU14 tu.
“Kitai andal amat chalun baru ( Paren) deka bulih pemujur ba Parlimen Kapit.
“Pia mega, DAP pechaya amat penuduk Parlimen Lanang, Sibu enggau Sarikei mengkang agi diempu DAP ba PRU14,” pia ku iya madah.
Ku iya, sida endang semampai bekenaka chalun ti ngembuan penau ulih megai rayat bediri genap maya pengawa bepilih.
Kelimpah ari nya, Chong mega pechaya sukung rayat diatu udah ngalih ngagai Pakatan Harapan (PH) maya diatu.
“DAP mega besai amat pengarap ngagai chalun ke udah disebut tu laban sida ukai semina ulih menang tang mega agi biak gawaka rayat,” ku iya madah baru.
Ba pengerami nya, DAP Sarawak bisi nyuaka pemeri ngagai raban sida ke suba ti kala mai mayuh budi ngagai parti.
Bela datai maya pengerami tu iya nya Chairman DAP Menua Tan Kok Wai, Chairman Parti Keadilan Rakyat (PKR) Sarawak Baru Bian enggau ex-Chairman DAP Sarawak Chong Siew Chiang.