Pengajar, apai indai patut besaup nempa pemanah ulah bala nembiak sekula
SPAOH: Bala pengajar enggau apai indai patut besaup, sepenemu ba pengawa nempa pemanah ulah bala nembiak sekula, pia ku Sapit Kepala Menteri Sarawak, Datuk Amar Douglas Uggah Embas.
Iya mansutka jaku nya lebuh bejaku bejadika Pengawa Nyuaka Duit KWAPM di Sekula Primari (SK) Spaoh semak ditu, kemari.
Ku iya, tanggungpengawa apai indai, pengajar enggau raban Serakup Apai Indai enggau Pengajar (PIBG) patut digempung kelimpah bebendar gawa ngiga jalai nempa nembiak nyulut.
“Kitai dekaka bala anak kitai liat agi sereta mantaika pemutus ti manah ba tetiap peresa. Kitai arap endar, enti pengawa nya dipejakka belama nadai kebuah nembiak SK Spaoh ngembuan mayuh nembiak ti nyulut,” ku iya.
Uggah ke mega Menteri Betanam Betupi Moden, Tanah Adat enggau Pemansang Kandang Menua madah, rayat patut patut beterima kasih ke pemansang ti diasaika kitai diatu.
Nya alai ku iya, ba pengawa ngemajakka agenda politik pemansang nya belama, rayat dikearap majak seruran be- gulai enggau perintah ke bisi diatu ngambika kitai deka seruran likun, lantang sereta senang.
Bekaul enggau pengawa meri duit KWAPM, tu siti ari pengawa perintah mantu nembiak seranta ngambika bela nerima bantu.
Bisi 153 iku nembiak udah nerima bantu nya. Kena bantu nya ungkup guna bala anak, ku iya.
Berebak enggau nya, Uggah mega madahka pengawa Kepala Menteri Sarawak ngelancharka ekonomi digital patut dikerebut rayat dikena nambahka penatai pemisi.
Ku iya nerang, peluang tu tau dikena rayat nyual mayuh macham produk nengah sistem ‘online’ seraya nambah, tu mih pengawa perintah Barisan Nasional (BN) ke bukai ngambika rayat ulih idup enggau lantang.
Ba pekara nambahka peneras internet di Spaoh enggau sekula nya, iya naka ulih nguji gawa ngambika peneras internetke tegap sereta ulih diasai enggau manah.
Berebak enggau nya, Uggah ngenataika pengaga ati sereta puji ngagau mayuh bengkah pengawa dipejalai bala pengajar SK Spaoh dikena ngangkatka tikas akademik nembiak kelimpah bejalaika kereja rama di sekula nya seraya ngarapka pengawa nya seruran dikereja.
Dulu agi ari nya, Uggah udah ngemendarka projek pemansang RM20,000 dikena meli bangku enggau mija nembiak, ngemanah sekula - nukar cheremin rusak (RM5,000), PIBG RM 20,000, dikena ngatur kelas tuisyen RM20,000 dikena nambahka agi penyulut ba pemutus peresa, seraya nembiak teulihka 6A udah nerima RM1,000 pemeri ari kuchik iya empu. RM 5,000 dikena meli bup di sekula.
Kelimpah ari nya, iya mega ngarapka Jaku English, Matematik enggau Sains deka betambah manah, ti patut diangkat di sekula nya.