Mayuh program latih, bantu disedia kena ngangkatka sosioekonomi rayat

KUCHING: Perintah nyendia mayuh program latih sereta bantu ke dikearap ulih ngangkatka sosioekonomi rayat.

Menteri Muda Pemansang Dagang Mit enggau Jelan Pemesai, Datuk Mohd Naroden Majais madahka program ke disedia nya tebal agi ungkup raban orang dagang.

“Ba pekara dagang aku berani madahka enda mayuh menua di dunya tu berat sereta mikir deka ngaga program ke tau ngangkatka sosioekonomi rayat.

“Ditu, mayuh ejensi perintah diberi tanggungpengawa enggau agih belanja ngambi ulih ngaga program.

“Program mungkur nyendiaka latih, pengelandik, pemansang produk sereta bantu dagang ngagai orang dagang baikka nya ba sentang duit jali tauka geran,’ku iya.

Naroden mansutka jaku nya rambau bejadi GREAT Sarawak 2018 di Borneo 744 di Kuching ditu, kemari.

Iya ke mega Menteri Muda e-Dagang nambah, bantu nya diberi ngagai semua kategori dagang iya nya ari dagang mikro nyentuk ngagai dagang kotej ke bejalaika operasyen ari rumah.

Ba minggu ke udah iya nya ba pengerami Hari SME Renggat Menua Ku Naroden, Menteri Besai Datuk Seri Najib Tun Razak nyendiaka agih belanja tambah RM2.9 bilion dikena mantu orang dagang di serata menua.

“Penyampau RM2.9 bilion disedia ungkup taun 2018 enggau 2019 ngagai semua orang dagang di serata Malaysia lalu tu mih peluang ke diberi perintah ngagai kitai,”ku iya.

Berindik enggau nya, Naro- den ngelalau orang dagang di Sarawak ngerebut peluang nya ngambi ulih sama bela ngemansangka dagang.

Ku iya, peluang tauka bantu nya enda datai pia aja lalu orang dagang meseti nyikap diri.

“Tenung jauh ke agi lalu kelala peluang nya kelimpah ti nemu ba dini peluang nya bisi,”tandu iya.

Beambika chunto Nengeri Sarawak, iya madah penyampau RM700 juta udah diagih ngagai nengeri tu dikena mantu orang dagang ba pekara duit jali sereta geran ba taun 2017.

Ba taun 2018, perintah nyendia RM900 juta ungkup tuju ke sama.

Iya netapka bantu nya ukai semina ungkup orang dagang bumiputera aja, tang bela mungkur orang dagang ukai Bumiputera.