Perintah nadai enda ibuhka pengelantang pendiau raban veteran ATM

KUCHING: Perintah nengah embing Menteri Besai Dato Sri Mohd Najib Razak enda ngelaung pemaik raban veteran Angkatan Tentera Malaysia (ATM) di serata menua.

Presiden Gerempung Veteran ATM Malaysia, Senator Laksamana (B) Tan Sri Mohd Anwar Mohd Nor madah pengeran nya suah dipandang perintah ngelama ke udah nengah mayuh bengkah pengawa ke udah diatur.

“Ba Manifesto Barisan Nasional (BN) ungkup Pengawa Bepilih Besai Ke-14 (PRU14) tu mega nyata mandangka pengiruh perintah ngagai raban veteran ATM ke alai 1800 buah rumah ungkup veteran ATM deka digaga,” ku iya.

Iya mansutka jaku nya ba pengerami ‘Ekspresi Prihatin Veteran ATM Negaraku’ di Kem Penrissen, ditu kemari.

Pengerami bela digulu Panglima Divisyen Pertama Infantri Malaysia ( 1 Div) Mejar Jeneral Datuk Stephen Mundaw.

Mohd Anwar nambah, perintah ngelamatu mega udah mayuh mantu raban veteran ATM ngambika nasit sida diintu enggau manah.

Ku iya, kena 31 Julai 2017, perintah meri RM1,500 setaun ngagai veteran ATM ti enda pinchin nengah program Bakti Negara.

Kelimpah ari nya, iya madah perintah mega meri RM600 setaun ngagai veteran ke enda nerima BR1M.

“Tu mandangka perintah nengak Opis Menteri seruran beratika pinta enggau peneka raban veteran,’ku iya.

Ba pengerami nya iya bisi ngagihka RM8,000 ngagai Gerempung Veteran Malaysia Sarawak, Gerempung Veteran Renjer Sarawak sepenyampau RM1,000 enggau Gerempung Veteran Soldadu Kor Renjer Sarawak, RM3,000.