Chalun ke dipilih ngarika sitak Santubong patut bisi penyulut

KUCHING: Barang sapa ke dipilih nganti penyandang ungkup sitak Santubong enda tau enda siku chalun ke nyulut, sereta ulih ngelui ari pengawa ke digaga penyandang kediatu, iya nya Datuk Seri Wan Junaidi Tuanku Jaafar.

Wan Junaidi nyaut nya nimbal berita selebubu ke madahka iya entara orang ke enda dichalun Barisan Nasional (BN) ngetanka sitak Santubong maya Pengawa Bepilih Besai (Parlimen) ke14 tu ila.

“Enda ngawa, enti nama aku enda dichalun ngetanka sitak Santubong (maya PRU ke-14) tu ila, tang kitai sama nganti enti nama aku bisi dilis tauka enda. Enti nadai, nadai meh nya,” ku Wan Junaidi.

Iya madah munyi nya lebuh dikerandau pengarang berita pengudah muka sebuah dewan di genturung pendiau Kampung Goebilt di sitak Muara Tebas, alai dewan nya ngangkatka nama iya, Dewan Datuk Seri Wan Junaidi Tuanku Jaafar ditu, kemari.

Wan Junaidi ti mega nyadi Menteri Rampa Menua enggau Pengeraja Asal madahka peneleba iya chukup lama,nya alai, ku iya, barang sapa ke nganti iya, enda tau enda ngelui ari pemanah pengawa ke udah digaga iya, nyengkaum nitihka chara iya ngereja pengawa.

“Nyema bisi orang bukai ke nganti aku, enda tau enda ngelui ari pemanah pengawa ke udah digaga aku, nyengkaum nitihka chara aku ngaga pengawa nya ditu.

“Aku kaban Parti Pesaka Bumiputera Bersatu (PBB), enda kala ngelaban parti sereta pemesai parti, tang majak nyukung pemesai parti sereta parti nya empu,” ku iya, ti mega nyadi siku Kaban Pemesai PBB (Kaunsil Tinggi PBB).

“Nya alai, aku enda nemu sama ke (disadang nganti iya) diberi peluang nganti aku, laban kediatu nadai pilih. Semina aku deka nyamin, sukung aku ari pun menua majak tegap ari taun 2013,” ku iya.

Lebuh ditanya baru, nyema iya di chalun baru, dipelabaka ulih ke enda menang besai baru, alai ku iya:

“Kitai ukai bejaku pasal ulih menang, tang kitai beratika margin. Enti diperatika sitak Pantai Damai ( 2013), 91 peratus (%) ari 100% ngundi aku, reti nya pemayuh undi nya udah niki ari taun 1999, lebuh sitak nya alai ba jari penyakal.

“Tang aku enggau naka ulih nguji nambahaka margin nya datai ke margin nya nyapai 91%, reti nya aku tu ‘trouble shooter’ ba sitak ke dipadah tusah menang. Nya alai, aku di anjung ngagai sitak Santubong ngambika sitak tu nyadi ‘burak’ baru,” ku iya.

Sebedau mangku pengawa nyadi Menteri Pengeraja Asal enggau Rampa Menua,kena 28 Julai 2015, Wan Junaidi kala nyadi Sapit Speaker di Dewan Rakyat, Sapit Menteri di Opis Menteri Dalam Menua (16 Mei 201328 Julai 2015) lalu udah kala nyadi Kaban Parlimen (MP) ke sitak Batang Lupar (19902004).

Ba atur pengawa nya kemari, dewan ke digaga enggau ungkus manggai RM700,000.00 nya, ke dikena komuniti ba sitak nya, deka digaga manah agi enggau ungkus RM300,000.00, ke deka disediaka enggau mayuh macham perengka guna bukai.