Dalam ‘Sarawak Digital Economy Strategy Overview (2018-2022)’ ngerintaika 29 pekara strategik pemerat ekonomi Sarawak
KUCHING: Bedau lama tu ke udah, perintah nengeri Sarawak bejadika ‘Sarawak Digital Economy Strategy Overview (2018-2022)’ ke patut disadung sereta dikunsi enggau mensia mayuh, alai bup nya bisi ditulis pasal kar digital dalam kandang empat taun.
Kepala Menteri Datuk Patinggi Abang Johari Tun Openg madah kar nya mantaika 29 pekara strategik ke ngerintaika pemerat ekonomi di Sarawak.
Siti ari pemerat nya bekait enggau pengawa betanam betupi, iya nya beratika pemansang asil bumai sereta pemujur chara bumai ke bepengelandik, ke ngena ‘precision positioning systems’ nengah GPS, nanam mayuh agi asil umai ti enda ngena mayuh perengka pemisi, sereta ngurangka kos.
“Kuasa mungkal ke pengawa bansa tu enda nyengala enti nadai beteladanka 18 pengawa strategik ke tau ngasuh pengawa nya mujur, nyungkak ekonomi.
“Semua penyampau kar nya bisi dalam 47 perambu pengawa strategik,” ku Abang Johari.
Iya madah munyi nya nengah teks jaku iya ti dibacha ulih Sapit Kepala Menteri Datuk Amar Douglas Uggah anak Embas lebuh bejadika ‘Forum Workforce of the future-Driving the Digital
Kuasa mungkal ke pengawa bansa tu enda nyengala enti nadai beteladanka 18 pengawa strategik ke tau ngasuh pengawa nya mujur, nyungkak ekonomi. Datuk Patinggi Abang Johari Tun Openg Kepala Menteri
Economy’ di sebuah hotel ditu kemari, ke diatur perintah nengeri Sarawak begulai enggau SCOPE, HRDF enggau tim Hay/Korn Ferry.
Iya nandu baru madahka, tiap perambu nya, dipejuraika nengah randau, sereta aum begulai enggau mensia mayuh sereta opis tauka ejensi perintah.
Taun siti nyin tadi ku iya, tetiap opis menteri diberi tanggungpengawa beratika jalai ngaturka pengawa, nambahka penyulut pengawa sereta betatika teknologi, ku iya.
“Ngereja pengawa tauka pekara baru sereta pengawa ke enda kala digaga kitai, sigi deka meri empas ke besai.
“Kitai enda tau enda beratika peluang muka ekonomi kitai empu di menua tu, lalu ngarap ulih negapka penyambung digital enggau serata dunya. Reti nya, nadai siti menua ulih bediri kediri , enti sida iya deka ngemanahka agi kualiti pengelantang pendiau mensia mayuh,” ku iya.
Abang Johari ti mega nyadi Menteri Wang enggau Perambu Ekonomi, madahka ba penemuai sambil belajar, sereta aum enggau pakar entarabansa enggau Perintah menua luar baka Australia, Finland enggau Estonia, taun siti nyin kemari,pekara bekait enggau digital tauka gigabyte tauka ekonomi terabyte, ukai semina bekait enggau teknologi tang ulih ngemanahka agi semua mensia.
“Taja pan, kitai enda ulih nyangkal teknologi kognitif deka ngubah bakani ku kaul kitai enggau komputer, laban siku-siku ngembuan perengka guna sereta akses ngena internet,” ku iya.
Nya alai ku iya, rayat Sarawak diatu enda tau enda mekuh ngagai pengawa ngangkatka pengelandik mutarka empas dalam industri baru nyengkaum Revolusi Industri 4.0.
“Ambika chunto, kompeni ke mungkal Industri 4.0 baka Lazada, Uber, Grab, Waze enggau mayuh agi bansa industri 4.0 mujur laban teknologi ke dikena nyadi pelasar,” ku iya.
Iya nandu baru, beratika pekara bekaul perintah nengeri ti numbuhka Opis Penguasa Multimedia Sarawak (SMA), Bank Pemansang Sarawak (DBOS) enggau ‘SarawakPay’ ngambika ulih ngelancharka agi kaul rentayan data besai sereta meransang chara ngena pemesai datai nya ari sukut komersil.
“Baruh Ordinan SMA 2017, nya deka nyadi siti palan alai ngempung semua ejensi (one stop agency) ke nyendiaka polisi enggau ngena program Ekonomi Digital sereta projek.
“Lalu pengawa SEDC deka beratika chara mutarka pemerat DE ke nyengkaum infrastruktur digital pengelikun siber, pemansang bakat, E- Dagang Pansik Digital dalam pekara R&D, Pengawa Dagang Digital enggau Perintah Digital,” ku iya.
Nengah perengka guna sereta ejensi tu ku iya, kompeni sereta serakup menua tu ulih nyediaka data ti nyengenda, pemujur analisis, sereta ngenataika pemujur ke besai ngagai servis pengguna.
“Tang kena beratika pemujur pengawa semua kuasa mungkal, begunaka rentayan sereta penemu penemu ari semua sukut sereta penyambung komunikasyen ba kededua ejensi perintah sereta peribit,” ku iya.
Abang Johari ti mega nyadi Menteri Pemansang Mengeri enggau Rampa Menua ngelalau pengawa Dagang Mit sereta Tengan Pemesai (SME) begulai enggau mensia mayuh beratika pekara tu enggau silik sereta ngembuan runding ke tebuka, ngambika sida ulih beambi ulih ba perengka guna ke ulih alai sida besemekih.
“Kitai enda tau enda ngubah runding kitai sereta mekuh jeman digital tu. Reti nya, nyadi ketuai digital mai reti kitai nguingka fokus kitai ari dalam ke luar, landik ngena analisis data ngambika ulih ngaga pemutus ke manah, sereta meransang kerejasama ke besai agi dalam industri,” ku iya.
Sama bisi enggau ngulu atur pengawa nya kemari, Menteri Pengawa Dagang Entarabansa enggau E-Dagang Dato Sri Wong Soon Koh, Menteri Utiliti Dato Sri Dr Stephen Rundi Utom, Menteri di Opis Kepala Menteri Datuk Talib Zulpilip, Menteri Pengelantang Pendiau, Komuniti, Orang Indu, Ruang Bilik, enggau Pemansang Anak Mit Dato Sri Fatimah Abdullah, Menteri Pengawa Dagang Temuai, Seni, Adat Pesaka, Nembiak, Lumba enggau Main Datuk Abdul Karim Rahmah Hamzah enggau Sapit Sekretari Perintah Menua Datu Dr Sabariah Putit.