JKMS kala meri bantu ngagai siku indu ti udah ‘viral’ di Facebook

KUCHING: Cherita ke nyadi ‘viral’ ti dibantaika ba laman rama ‘Facebook’ ke madahka suah endar tepedaka siku indu enggau bala anak iya sesegau ba endur orang ngaga rumah, iya nya penerima bantu ari Opis Pengelantang Pendiau Sarawak (JKMS).

Menteri Pengelantang Pendiau, Komuniti, Orang Indu, Ruang Bilik enggau Pemansang Anak Mit ( KKKWKPK) Dato Sri Fatimah Abdullah madahka ketegal cherita ‘ viral’ nya kemari, pemesai ari JKMS ngelawa rumah indu nya di Kota Samarahan, lalu sigi bisi betemu enggau indu nya empu.

Fatimah madahka taja pia, bantu ari JKMS nya diketuka dalam bulan Julai taun siti nyin tadi.

“Ari tasat kami, indu nya sigi udah sarak lalu iya mega siku penerima bantu JKM sebedau tu.

“Kebuah bantu iya diketuka ulih JKMS, laban enda ngeripot diri empu ngagai opis kami ninting bulan, kelimpah ari pedis endar digiga endur sida menyanak diau entap, nya kebuah bantu nya diketuka,” ku iya.

Fatimah madah munyi nya lebuh bejaku ba atur pengawa.

Beserimbai enggau Nyain Sempekat Pemereti Ati (MoA) entara Opis Orang Indu enggau Ruang Bilik begulai enggau vendor Palan Latih Orang Indu (WWTC) di opis nya, ditu, kemari.

Sama bisi enggau ngulu atur pengawa nya, Menteri Muda Orang Indu, Ruang Bilik enggau Pemansang Anak Mit, Rosey Yunus enggau Menteri Muda Pengelantang Pendiau Komuniti, Datuk Francis Harden Hollis ditu, kemari.

Iya nandu baru, madahka enti nitih ku iya, rumah orang indu nya, ke berumur 46 taun, sigi ngena alamat di Kota Samarahan, lalu ari tusui bala kaban belayan indu nya, madahka indu nya sigi seruran bepindah ari siti endur ngagai siti endur bukai, bebaika bala anak iya.

“Pemesai kami ke ngelawa sida sebilik maya di kota Samarahan kemari bisi ngasuh indu nya minta bantu JKKS pulai baru, lalu baka nya mega, ngarapka mensia mayuh (ke diau besemak enggau sida iya) madah ngagai JKMS enti sema indu nya agi sesegau bebaika bala anak iya,” ku iya.

Semina diatu ku Fatimah, ke ngirauka ati, enggai ke indu nya berengkah ngangkut bala anak iya baru lalu mindah ari siti endur ngagai siti endur, ke tau ngujungka indu nya dipadah enda ibuhka anak iya.

“Enti ditemu, indu nya ninggal, tauka enda kiruh ke bala anak iya, kami ulih ngambi atur kuasa undangundang nyaga anak mit nya,” ku iya, ke minta padah mensia mayuh enti sida iya bisi tetemuka indu enggau anak iya sesegau sebelah nya.