Orang tuai ke lenyau ba Sg Julau udah ditemu SAR
SARIKEI: Siku orang tuai ke diripotka nadai mulaika diri kenyau ari Hari Lima tu tadi pengudah nurun ke kebun ti enda jauh ari Rumah Unsa, Jagoi, Pakan ditu, udah temu.
Bangkai niang Ukat Abon, 74 taun ditemu raban Ngiga enggau Nyelamat ( SAR) urung pukul 9 pagi kemari, urung dua kilometer ari iya dipelaba labuh ke dalam Sungai Julau.
Nitih ku siku ari sida sebilik, niang ke peranak asal ari Rumah Serit, Tanah Putih, Sarikei, udah mindah kediri ngena perau iya, ngabas kebun ti enda jauh ari Rumah Unsa, pagi Hari Lima tu tadi.
Taja pia, urung pukul 11 pagi, sida tepedaka perau iya kira urung 50 meter ari penyangkai ngelama tu.
Barang iya nyengkaum baju ditemu dalam perau seraya selipar ditemu ba tebing sungai di pendai nya.
Ngadang bisi utai enda manah nyadi, sida sebilik ngaga ripot polis pasal orang lenyau di Opis Polis Julau urung pukul 4 lemai, Hari Lima nyin tadi.
Ketuai Opis Pengerara Api enggau Penyah Penusah (Bomba) Bintangor, Nicholas Belulin madahka sida dipadah pasal penusah nya ari Polis Julau urung pukul 4.56 lemai, iya nguluka siti tim ngesah ngagai endur penusah nyadi.
Baka selama, raban sida begulai enggau Polis ngempung penerang ari sida nya sebilik lalu udah nya bejalaika operasyen SAR.
Pengudah operasyen SAR ke mega disereta sida nya sebilik enggau peranak rumah panjai ke bukai enda tegigaka Ukat, sida ngetuka operasyen urung pukul 6.30 lemai.
Pengawa raban SAR berat agi dipejalai di Sungai Julau, belalauka penerang ke diberi sida sebilik, melabaka Ukat labuh ke dalam sungai lalu ditabankan peneras arus, ku Nicholas.
Ba hari kedua operasyen SAR, sida ngemesaika kandang ngiga ngagai dua kilometer ke ili Sungai Julau berindik ari arus ke deras, ku Nicholas.
Sida sebuat ngemaduka operasyen pengudah nyerahka bangkai niang ngagai polis urung pukul 9.25 pagi, ku iya nambah.