Sebengkah portal berita madah gaji orang gawa perintah deka dibayar dua kali sebulan, kebendar nya nyadi ba menua sepiak
PUTRAJAYA : Perintah tetap neruska atur mayar gaji sebulan sekali ungkup pengereja pengawa perintah, bala dipejalai ngelama tu, ku Kepala Direktor Pengereja Pengawa Perintah Tan Sri Zainal Rahim Seman.
Tu bepelasarka ripot sebengkah portal berita ke madah bayar gaji dua kali sebulan deka dipejalaika enda lama agi, iya ngenadaika pekara nya lalu madah nya sigi enda nyadi ba Malaysia tang kebendar ba menua sepiak.
Nya alai, iya ngelalau orang gawa perintah ba menua tu anang tusah ati enggau berita selebubu nya.
“Nyadi, dikena ngemaniska jaku enggau pengelantang, kitai anang mendingka sebarang berita selebubu,” ku iya madah ngagai pemberita pengudah nutup program Bulan Bahasa Kebangsaan Renggat Opis Perintah ditu, kemari.
Nitihka ripot portal nya, atur nya deka dipejalai dikena mantu orang gawa perintah ngatur belanja diri empu sereta pejalai belanja rumah pangka ari rega minyak ke majak niki.
Nangkan nya, Zainal Rahim madah piak sida merambu deka meratika baru Notis Servis Lumur 9 Taun 2011 pasal Atur Ngena Jaku Kebangsaan Ba Opis Perintah lalu nambahka pekara audit enggau neritka atur bekaul enggau isu notis nya.
Iya madah, notis nya ngelama tu enda kala dikemanah, semina nerangka pasal chara enggau atur ngena jaku kebangsaan tang nadai nepi pekara bekaul enggau audit sereta penerit adat.
“Kitai beratika pengawa ngena jaku kebangsaan ba mensia mayuh, lebih agi Piak Kaunsil Kandang Menua (PBT) agi bedau dikemerat. Berindik ari nya, pengawa meresa notis nya deka dikereja ngambi ulih nyadika malin semua ejensi enggau opis perintah dalam ngenegapka jaku kebangsaan,” ku iya.
Ba pengerami nya, Presiden Kaunsil Nembiak Malaysia ( MBM) Mua’amar Ghadafi Jamal dipilih nyadi penerima anugerah ‘ Ikon Pejuang Bahasa’ 2017. — Bernama
Nyadi, dikena ngemaniska jaku enggau pengelantang, kitai anang mendingka sebarang berita selebubu. Tan Sri Zainal Rahim Seman Kepala Direktor Pengereja Pengawa Perintah