Masing: Ekpressway deka ngemandakka pejalai ari Kuching ke Sibu
KUCHING: Sapit Kepala Menteri Tan Sri James Masing madah projek Ekpressway Kuching ke Sibu enggau Sebuyau ke Betong deka ngemandakka pejalai perengka pengangkut ari Kuching ke Sibu.
Ku iya, ekpressway nya mungkur pejalai ari Kuch- ing-Samarahan, Sri AmanBetong enggau Sibu-Sarikei nyadi sebengkah projek tebing pantai ke mungkur pengawa ngaga jematan.
“Ekpressway deka mandakka pejalai ari Kuching ke Sibu urung 170KM.
“Nengah Jalai Pan Borneo, kitai begunaka timpuh 5 jam ari Kuching ke Sibu tang nengah ekpsressway pejalai kitai semina 3 jam setengah aja,” ku iya.
Masing mansutka jaku nya lebuh nyimpul jurai Aum DUN Ke-18, Penggal Kedua di Komplek DUN ditu, kemari.
Iya ke mega Menteri Pe- mansang Infrastruktur enggau perengka Pengangkut ( MIDT) nambah, projek ekspressway dibagi ngagai dua pakej.
Pakej A ku iya berengkah ari Kuching, Sebuyau, Roban enggau Sibu iya nya urung 225 KM penyauh.
“Pakej B berengkah ari Sebuyau ke Sri Aman enggau Betong ke sepenyauh 100 KM,”ku Masing.
Iya pechaya ekpresway nya ila deka muka kadang endur ngelingi ba pengawa dagang lalu mai pemaik ekonomi ngagai peranak ke diau ngelingi.
ADUN Baleh nya nam- bah, projek ekpresway deka mungkur pengawa ngaga jematan meraka Batang Lupar, Batang Saribas, Sungai Krian, Batang Rajang, Batang Paloh enggau Muara Lasan.
Ngenang kaul ke sama, iya madah satu pertiga ari agih belanja pemansang ba penyampau RM3.06 bilion deka dikena ngemansangka infrastruktur.
“Tu nyengkaum pengawa ngaga jalai, palan penyangkai kapal, perengkaguna mensia mayuh, sekula enggau perengka internet ti nyaup pengerembai ekonomi digital,”ku iya.