Projek pemansang ti dipejalaika enda tau enda bisi ripot EIA
KUCHING: Semua projek pemansang ke digaga di menua tu enda tau enda bisi surat sukung rampa menua kena nyukung ripot audit sida.
Menteri Muda Perambu Mengeri,Pengawa Mutarka Tanah enggau Rampa Menua Datu Len Talif Salleh madah, sebedau tu pan sigi bisi ripot audit ti digaga orang ke ngaga projek pemansang tang nya lebih agi ngagai ripot ‘Environmental Monitoring Report’, ku iya.
“Diatu sesapa ke ngaga projek pemansang di menua tu enda tau enda ngaga surat sukung sida dikena nyukung ripot audit bepelasarka rampa menua.
“Ripot bepelasarka aktiviti, sais sereta gaya bukai projek nya. Enti nitih, kuntriktor patut nemu.Kami pan deka madah ngagai sida kuntriktor tauka orang ke ngaga projek pemansang nya enda tau enda nganjung ripot ninting taun sida.
“Ripot nya deka mungkur sais sereta aktiviti ba pekara ti dikemerat orang ngaga ripot EIA (Environment Impact Assessment), lalu EIA nya deka nyadi atur sereta pemendar ke enda tau enda dititih,” ku Len Talif.
Iya madah munyi nya lebuh dikerandau pengudah bejadika ‘ Environmental Conservation for Sustainability Seminar 2017’ ti diatur Opis Institut Kimia Malaysia bekerejasama enggau Kaunsil Rampa Menua (NREB) di sebuah hotel ditu,kemari.
Atur pengawa bekaul enggau rampa menua mega ku Len Talif, deka dipenyadika Kepala Menteri Datuk Patinggi Abang Johari Tun Openg bulan baru tu ila (Disember).
“Berengkah ari bulan baru tu ila (Disember) pengudah Kepala Menteri bejadi atur pengawa tu, semua kuntriktor tauka orang ke ngaga pemansang di menua tu enda tau enda nitihka audit rampa menua tauka EIA ke deka diteritka agi nyengkaum bisi akta kediri empu.
“Tu atur ke bisi nambah, digaga perintah nengeri, dikena beratika semua prosedur ti enda tau enda di titih. Audit rampa menua siti singkang dikemansangka dikena beratika semua pengawa pemansang di menuati enda tau enda ngaga audit rampa menua,” ku iya.
Pemujur nitihka undangundang rampa menua ke udah disengkaum dalam sistem ke lalu nyadi atur sistem nya empu ti patut dititih.
Nya deka nyadi atur ke udah ditetapka, siti pengawa ke manah laban audit nya nyadi sebagi ari pengawa ke patut digaga sereta disengkaum dalam sistem rampa menua, ku iya.
Taja pia ku iya, keterubah tu engka bisi mar mimit dititih tang nyau kelama nya ila nya deka nyadi proses ke patut digaga dikena beratika semua pemerat ke deka dikena tauka digaga orang nya, udah bisi dalam sistem, ku iya.
Taja pan udah bisi ripot audit, ripot nya ila, deka diperesa sebengkah agi audit, ke dikumbai ‘Third Party Audit’ dikena sida iya berati tauka meresa pengawa ke digaga nengah audit dalam,” ku iya.
Taja pia, Len Talif madahka kompeni tauka orang ke enda nitihka atur audit nya tau diukum RM30,000 lalu penyampau nya deka ditambah.
“Kompaun ke pemadu mayuh naka ke diatu ba orang ke ngelaban atur audit nya manggai RM30,000 lalu penyampau tu deka ditambah enda lama agi.
“Pekara bekaul enggau rampa menua tu nyadi pekara semua rayat. Enti suba lebuh kitai deka ngatur undangundang ba sekeda pekara rampa menua, mensia mayuh ngenggaika nya laban kenu bisi ungkus,” ku iya.
Sama bisi ngulu atur engawa nya kemari, Kontroler NREB Peter Sawal enggau chairman IKM Pampang Sarawak, Dr Alvin Chai Lian Kuet. KOTA SAMARAHAN: Bisi 1,438 iku nembiak Univerisiti Teknologi MARA (UiTM) Pampang Sarawak udah graduet ba pengerami Konvokesyen UiTM Ke-87 ke diatur kemari enggau sehari tu, ba Dewan Jubli universiti, ditu.
Sesi meri gelar ngagai 1,438 iku ke graduet nya dibagi nggai empat sidang nyengkaum 362 iku graduet sidang keterubah (kemari), 354 iku graduet ba sidang kedua (kemari), 366 iku gradue ba sidang ketiga (sehari tu) enggau sidang keempat (sehari tu) bisi 356 iku.
Konvokesyen nya dipenyadika Pro Canselor UiTM Tun Datuk Seri Panglima Ahmadshah Abdullah.
Nambahka nya, Rektor UiTM Pampang Sarawak Profesor Dato Jamil Hamali enggau bala sapit rektor, penulung rektor, ketuai pusat pengajian enggau bala pengelicha sereta apai indai sama bisi datai ngagai konvokesyen nya.
Ari penyampau 1,438 iku ke graduet nya mungkur 417 iku graduet nerima ijazah sarjana enggau 1,021 graduet nerima diploma.
Bala graduet nya nyengkaum sekeda fakulti baka Fakulti Perakaunan, Fakulti Perladangan enggau Agroteknologi; Fakulti Sains Komputer enggau Matematik; Fakulti Kejuruteraan Awam; Fakulti Pengurusan Hote enggau l pelancongan enggau Fakulti Sains Sukan enggau Rekreasi.
Fakulti bukai baka Fakulti Pengurusan Perniagaan; Fakulti Kejuruteraan Elektrik; Fakulti Sains Kesihatan; Fakulti Pengurusan Maklumat: Fakulti Sains Pentadbiran dan Pengajian Polisi; Fakulti Pendidikan; Fakulti Seni Lukis enggau Seni Reka; Fakulti Senibina, Perancangan enggau Ukur; Fakulti Sains Gunaan sereta Fakulti Pengurusan enggau Teknologi Pejabat.
Nyerumba konvokesyen ke sekalitu bisi 87 iku graduet penerima Anugerah Naib Canselor (ANC).
Penerima gelar ti pemadu nyulut renggat Sarjana Muda iya nya Mohd Hafiz Abdullah (Sarjanan Muda Sains Teknologi enggau Pengurusan Perladangan ( Kepujian)) nerima Anugerah Graduan Terbaik Keseluruhan UiTM Sarawak enggau Anugerah Graduan Terbaik Kepimpinan kelimpah ari Abang Fazli Abang Shazali (Sarjana Muda Pentadbiran Perniagaan (kepujian) Kewangan) nerima Anugerah Graduan Terbaik Khas UiTM Sarawak Tajaan Yayasan Sarawak.
Lalu ba renggat diploma, Anugerah Graduan Terbaik Keseluruhan UiTM Sarawak diterima Felix Joshua Tommy (Diploma Sains) sereta Anugerah Graduan Terbaik Khas UiTM Sarawak Tajaan Yayasan Sarawak diberi ngagai Naretta Janne Luta ke ngambi Diploma Pentadbiran Awam.