Polis Sarawak mujur ngemunaska ‘judi ikan’ di selampur nengeri tu
KUCHING: Ketuai Jabatan Siasatan Jenayah (JSJ) SAC Dato Dev Kumar madah polis Sarawak udah mujur ngemunaska ‘judi ikan’ nyengkaum mesin judi tu di serata menua Sarawak.
Dev madah semua Palan Pemerindang Diri Sebilik (PHK) enggau kelab rekreasyen ke bisi muka pengawa bejudi tu lama udah dipeda nadai dibuka agi.
“Dikarapka tu meh pengujung iya ‘judi ikan’,” ku Dev madah nengah surat ti dianjung opis nya ngagai Biik Berita ditu,kemari.
Taja pia, iya madah pengawa bejualka 4D enggau chara ke salah (illegal) sereta main judi siber bisi napi penanggul mimit laban pengawa bansa tu taja pan enda nyata dipeda mata, tang sida ke bejalaika judi siber tu landik agi, enggau chara muka kaunter baka ke nyual kredit talipaun binching.
“Taja pan nyauka ninting minggu, (raids) digaga, kaunter nyual 4D ke ditagang (illegal) majak bejalaika pengawa salah sida iya, tang enda entu berupai. Enti suba muntang endar nangkap sida tu laban ditemu bisi perengka guna komputer, laptop, sereta tablet kena bemain judi siber. Tang udah kedai judi siber tu ditutup di menua tu, sida e bejalaika judi siber majak ngaga pengawa salah sida iya, nupi pemain judi ke nyau ketagih.
“Chara kaunter tu dibuka enda berupai endar bisi kaul enggau judi siber. “Pengawa sida nyendiaka servis ‘reload’ ngena talipaun binching. Udah pengguna nya bulih ‘reload’ ba tablet tauka talipaun binching sida iya, sida ke ketagih main judi tu ulih bemain judi ba barang endur, di rumah tauka di kedai kopi,” ku iya.
Kepala Polis Sarawak, Dato Amer Awal, orang ke terit enggau pengawa bemain judi minta semua Ketuai Polis Pelilih Menua (OCPD) betang- gungjawab agi kelebih agi ba sitak ke dijaga sida iya, ngemunaska semua bansa judi.
“Polis Sarawak deka majak beratika pengawa bemain judi tu ulih dikemunaska di Sarawak,” ku iya.
Nitihka rikod, ari 25 September ngagai 1 Oktober, polis Sarawak udah mujur ngaga peresa ngenyit ba palan nya ti ngujungka 96 iku orang ditangkap.
Ari penyampau ke ditangkap, 57 nya lelaki, lalu sida ke bukai nya indu, ke berumur entara 17 ngagai 67 taun, lalu 10 iku sida bukai, ari menua bukai.
Semua sida ke ditangkap nya, deka ditasat nengah ‘Common Gaming House Act 1953 ssereta Genteran Tusun Ukum Imigresen’.