PIBG engkeman dikena nyungkak pemansang sekula
Tanggungpengawa gerempung tu ulih nyadi jematan ngagai sekula nyapai juluk nyulut dalam pelajar
SRI AMAN: Sapit Menteri Dalam Menua II Dato’ Masir Kujat madahka Gerempung Apai Indai enggau Pengajar (PIBG) iya nya entara seiti gempung ti engkeman lalu endang dikemerat dalam pemansang sebuah sekula.
Ku iya, kitai enda ulih ngenggaika tanggungpengawa PIBG di tetiap sekula ke meri empas kelebih agi ngagai pemansang enggau penyulut sekula. Pekara tu berindik ari PIBG nyadi seiti jalai tauka jematan dikena nentuka tuju sereta juluk sekula nyapai penyulut dalam pelajar, lalu ari atur PIBG ti manah sereta sistematik deka ngadaka sekula ti mansang.
“Penyulut tetiap organisasyen tauka gerempung iya nya nengah beberapa elemen ke patut dipejalai begulai.
“Berindik ari nya aku ngelalau kita begulai rat enggau pangan diri ngambika bisi mansutka buah runding dikena ngangkat sereta ngemansangka PIBG ungkup penyulut pelajar anak kita. Elemen penyerakup entara tetiap kaban endang berat ke ulih nyadika tetiap organisasyen nya ngena enggau naka ulih sukung sereta buah runding dikena nyapai penyulut ti ulih ngemegahka semua,” ku iya.
Iya ke mega Kaban Parlimen (MP) Sri Aman madah munyi nya lebuh ti bejaku bejadika Pengerami Merarau Begulai Enggau Pemesai ke diatur PIBG Sekula Primari (SK) Batu Lintang ditu, kemari.
Ku iya, juluk dalam pela- jar iya nya endang seruran ngemeratka buah runding enggau pemansang jemah ila. Berindik ari nya, dikena nentuka pengingin tu dijapai nitihka ke deka kitai, lalu entara strategi ke patut digaga iya nya ngempitka kaul entara sekula enggau apai indai nengah PIBG.
“Pengawa enggau kaul manah apai indai, pengajar enggau komuniti patut diteruska sereta ditanggam rat. Kaul sereta kerejasama tu ulih ngadaka penyerakup ti seruran begunaka pangan diri dikena nyungkak penyulut sekula,” ku iya nyemetak.
Kelimpah ari nya, PIBG mega ulih nyadi jematan ti ngaul opis perintah sereta Gerempung Ukai Dikuasa Perintah ti ulih ngadaka kaul sereta penemu pintar ungkup pemaik semua.
“Penanggul rama ke ditapi diatu endang ba tikas ti ngirauka kitai semua. Kes jenayah rama enggau pengawa ke enda menuku ti ngaul raban nembiak sekula chukup tinggi. Mayuh pekara ti ulih ngasuh hal tu nyadi, lalu enda patut nyerahka siti piak aja.
“Berindik ari nya, kes tu patut dikemerat semua piak. Ditu mih endur tanggungpengawa PIBG ngambika sama segulai sejalai enggau sekula. Pendidikan Moral enggau nerenakka ulah ti manah ungkup nempa modal mensia patut diberi ngagai bala anak ngambika pengawa ke enda menuku ulih diselihahka tumu,” ku iya nandu.
Berindik ari nya, PIBG patut chakah sereta ngaga pelin strategik di sekula ngambika ulih meri sukung ti manah dalam proses nempa penyulut.
“Kemeranka penemu enggau kereja ti nyulut patut dikemeran sereta diterenak ngambika PIBG tu terus relevan lalu nyadi penyukung ngagai penyulut pelajar bala anak,” ku iya nambah.
Sama bisi datai iya nya Pemesai Pelajar Pelilih Sri Aman Vivien Mujah, Kepala Pengajar Leonard Libau sereta eksko PIBG ke bukai.
Rambau pengerami nya, Masir udah ngemendarka agih belanja RM20,000 ungkup pengawa ngaga agu sekula ba taun 2018 lalu RM5,000 ungkup PIBG ba taun 2018 lalu RM5,000 ungkup taun 2017.
Dato’ Masir Kujat Sapit Menteri Dalam Menua II