Ni perambu deka ngaga padang bilun di Batang Ai ?

Perambu nya kala dibantai Dato Seri Michael Manyin enggau ba surat berita tujuh taun ke udah, ku Cobbold

SRI AMAN: Parti Bansa Dayak Sarawak ( PBDS Baru) minta jaku penerang ari Perintah Barisan Nasional ( BN) Sarawak sentang perambu ngaga palan penyangkai/penerebai bilun di Batang Ai ke kala dipansut ba The Borneo Post tujuh taun ke udah.

Kena 25 Mei 2010, Menteri Pemansang Infrastruktur enggau Komuniksyen (maya nya) Dato Seri Michael Manyin Jawong diberita madah bisi perambu Batang Ai disikap enggau palan penerebai/penyangkai bilun.

“Iya madah ngagai Kaban Kunsil Nengeri(ADUN) Batang Ai ke alai perambu nya udah dipasuk dalam program Opis Menteri Pengangkut,’ku Cobbold nengah surat penerang berita kemari.

Cobbold ke nyadi presiden PBDS Baru ke mega chalun parti ba P202 Sri Aman dekaka perintah meri penerang sentang status perambu nya.

Kelimpah ari palan penyangkai/penerebai bilun nya, sebuah sepital moden mega bisi diperambu digaga ungkup peranak Lubok Antu.

Cobbold nambah, peranak di Batang Ai nyentuk ke diatu mengkang begunaka jalai ai ba pengawa mindah kin kitu.

“Kitai diatu kurang tiga taun deka nyingkang ngagai menua mansang enggau visyen 2020. Sekalika kitai ba jalai ke betul..?,”ku iya nanya.

Iya mega ngelalau pengundi di Sri Aman enggau Lubok Antu meri sukung ngagai chalun PBDS Baru ba pengawa bepilih ti deka datai.

Iya madah ngagai Kaban Kunsil Nengeri(ADUN) Batang Ai ke alai perambu nya udah dipasuk dalam program Opis Menteri Pengangkut. Cobbold Presiden Parti Bansa Dayak Sarawak (PBDS Baru)