Perambu muka opis KPDNKK Betong disukung
Nengah tu raban pemesai muntang bejalaika pengawa ngambi pedagang enda peneka ngeletak rega
BETONG: Pengawa numbuhka pampang Opis Menteri Dagang Dalam Menua, Koperasi enggau Orang Bebelika Barang (KPDNKK) di Betong endang dikelaluka Kaban Kunsil Nengeri ( ADUN) Layar, Gerald Rentap Jabu ngambi ulih nyendiaka servis ungkup peranak ditu.
Ku iya, pemisi opis KPDNKK di Betong ulih gawa matau rega barang ke dijual orang dagang ditu ti dikumbai ngelui ari pematut laban jarang dipatau piak KPDNKK.
“Kitai ngarapka pemesai ulih bejalaika tanggungpengawa meri timbal positif nga- gai perambu muka pampang KPDNKK ditu.
“Berebak enggau nya, pedagang dikearap enda nikika rega barang sepeneka ati enggau enda nitihka pematut ti udah ditetap laban tau ngenusah rayat,” ku iya.
Iya mansutka jaku nya rambau bejaku bejadika Showcase Keusahawanan, Karnival Kepenggunaan enggau ACSJ IV Betong 2017 ba Laman Pesta, Medan, Bandar Baru ditu, malam kemari.
Tambah mega ku iya, program ke nyadi pengawa ninting taun ditu dikearap meri awak ngagai peranak Betong chakah ngaul diri dalam pengawa dagang ti tau nambahka penatai pemisi ruang bilik.
“Kitai endang meransang sukung semua piak nyereta program ti diatur sereta meri awak ngagai komuniti diau besemak ngemansangka diri enggau nambahka penatai pemisi sida empu.
“Pia mega, aku minta rayat bela ngaul diri ba pengawa pemansang nuju jeman digital baka ti dijuluk Kepala Menteri Datuk Patinggi Abang Johari Tun Openg lalu pekara ti beguna endar mujur ngemansangka produk ke bisi nengah internet,” ku iya.
“Kelimpah ari nya, bala kita mega dipinta nyediaka diri ngena program Sarawak Pay iya nya sistem e-wallet ke alai chara dagang nengah jalur lebar ti dipejalai.
“Nya alai, kitai patut nyikap diri ngambika sedia tumu agi nguing kia,” ku iya.
Karnival ti diatur nyadi siti ari pengawa begulai KPDNKK, Opis Residen Betong, Komiti Pemansang Orang Dagang Bumiputera ( MPUB), Kaunsil Pelilih Betong( MDB), Opis Menteri Betanam Betupi Moden, Tanah Adat enggau Pemansang Kandang Menua Sarawak sereta dikemujurka Top Event Services Sdn Bhd meri pemerat enggau mer- ansang pengawa dagang.
Pengawa tu dipejalai mega dikena nentuka barang enggau rega ti patut.
Sama bisi datai Chairman Begulai Showcase Keusahawanan, Karnival Kepenggunaan enggau ACSJ IV Betong 2017, Dr Richard Rapu, Sapit Chairman Induk, Akoi Ejau, Sapit Pemadah enggau Ketuai Penerit Adat Nengeri Sarawak, Abdul Hafiz A Ramli, Ketuai Bagi Pengawa Pemansang Orang Dagang (SME) enggau Ketuai Pemansang Pengawa Industri enggau Orang Dagang (MIED) Sarawak, Pemesai Pelilih Betong, Khalid Andong sereta bala ketuai opis sereta komuniti ke bukai.
Berebak enggau nya, pedagang dikearap enda nikika rega barang sepeneka ati enggau enda nitihka pematut ti udah ditetap laban tau ngenusah rayat. Gerald Rentap Jabu ADUN Layar