Penembu Jematan Besi ba Sungai Selepong ngelantang 67 ruang bilik
KAPIT: Kaban Kunsil Nengeri (ADUN) Bukit Goram Jefferson Jamit Unyat bisi bejalai ngabas sekeda Projek Transformasyen Menua Pesisir (RTP) ti dipejalaika di sitak iya apin lama ke udah.
Antara projek ti dipejalai iya nya penyikap perengka guna pemun enggau infrastruktur di rumah panjai enggau genturung pendiau pulaika pemaik ngagai rayat.
Tu nyengkaum jematan besi, jalai semin enggau endur making kerita sereta ke bukai.
Jematan besi meraka Sungai Kapit ti nyambung ngagai Rumah Nyuang ngagai jalai besai, Jalai Bukit Goram, jalai semin enggau palan paking kerita ba Rumah Osman Minggang sepemanjai Jalai Bukit Goram, jalai semin nyambung Rumah Meliyu ngagai Tabika KEMAS di Sungai Sesibau, jemata besi Sungai Selepong, Gentulong Selepong 3, Jalai Selirik, sereta ke bukai.
Jamit ngena awak kemisi panjai iya berengkah ari 31 Ogos ngagai 2 September ngatur pejalai ngabas ngagai sitak iya betemu enggau bala rayat sereta meresa projek ti sekeda iya udah tembu seraya ke bukai benung digaga.
Seiti ari projek nya ngaga jematan besi meraka Sungai Selepong, Gentulong Selepong 3, Jalai Selirik ditu. Jematan tu 12 kaki kali 40 kaki ari tiang ngagai tiang udah tembu tu meri pengelantang ngagai 67 buah ruang bilik.
Lebuhka dirandau pengarang berita, Jamit madahka diri puas ati projek nya udah dipejalai enggau lanchar. Iya meri terima kasih ngagai piak kunteriktor ti bejalaika pengawa enggau manah nitihka spesifikasyen sereta mega peranak menua nya mantu lebuhka kereja dipejalai.
Bisi nyempulang pejalai Jamit iya nya Temenggong Tan Kian Hoo, Pemanca Yong Thu Fook, Penghulu Sia Shui Poh, Penghulu Wong Kie Ing, Penghulu Uga Esop, Kapitan Kong Cheak He, Kapitan Yap Hui Le, Chairman SADIA Kapit Edward Manggah, sereta pengari JKKK Bandang Anak Mambong.