Pekit KJA 2017 nerima timbal ke chukup manah ari pemberita

KUCHING: Pekit Anugerah Pemberita Kenyalang (KJA) 2017 nerima timbal ke chukup manah ari pengarang berita di serata menua Sarawak.

Pekit besai tu dipenyadika Kepala Menteri Datuk Amar Abang Johari Tun Openg kena 22 November 2017 di Miri lalu bisi nerima urung 400 penyereta ari pengarang berita sereta tukang gambar ari media jaku Melayu, English, Mandarin enggau Iban ari serata Sarawak.

Pengawa nyereta pekit tu udah tutup kena 1 Ogos tu tadi lalu topik ke endang dipilih Kepala Menteri, Ekonomi Digital mega udah ditutup kena 31 Ogos 2017 tu tadi.

Semua pom penyereta udah dianjung nengah Angkatan Zaman Mansang (AZAM) ke nyadi palan ngempuruka penyereta nya ngambika diputuska bala akim.

Taun tu, urung 10 kategori deka dipekitka enggau perais duit lebih RM150,000.00 deka di menang bala pengarang berita menua tu.

Entara kategori ke pemadu besai iya nya Anugerah Kepala Menteri ti nyendiaka perais urung RM5,000 ungkup pemenang, ke ditulis dalam jaku Melayu, English enggau Mandarin.

Udah nya kategori bukai baka Ripot Berita’, Berita Pandak, Anugerah Berita Begambar, Berita Penyambung, Dagang enggau , Esei Begambar enggau Pendiau Pengidup Komuniti sereta Pemansang Menua Pesisir ke nyendiaka perais RM3,000, RM2,000 enggau RM1,000 (lumur satu, dua enggau tiga).

Semua kategori nya dikarang dalam jaku Melayu, English enggau Mandarin, lalu semina dalam kategori Anugerah Ripot Berita nyendiaka pekit ngagai pemberita jaku Iban.

Pekit tu mega nyengkaum ‘ broadcasting’ , ke dibuka ngagai pengarang berita, tukang gambar sereta tukang kamera ari stesyen televisyen ti nyendiaka perais manggai RM3,000, RM2,000 enggau RM1,000 (lumur satu,dua enggau tiga).

Kelimpah ari nya, ba kategori Gambar, diungkup ngagai tukang gambar ke bisi berejista enggau Opis Pemadah, nyendiaka perais RM2,500 (lumur satu), RM1,500 (lumur dua) enggau RM800 (lumur tiga).

Taun tu, Gerempung Tukang Gambar sereta Pemberita Sarawak (SPPA) ngungkupka seiti gelar baru ngagai tukang gambar pemberita, dikumbai ‘Anugerah Penerang Begambar ti nyendiaka perasi RM1,000 (lumur satu), RM800 (lumur dua) enggau RM500 (lumur tiga).

Pemelanja ke pemadu mayuh ngagai pekit tu iya nya Perintah Nengeri Sarawak, Petronas, Sarawak Energy Berhad enggau Shell sereta ijinsi bukai ke nyukung KJA.

Atur pengawa KJA digaga laban dikena meri basa ngagai pengawa media ngagai komuniti.

Entara gerempung pengarang berita di serata menua Sarawak ke bela nyukung atur pengawa tu nyengkaum Gerempung Pengarang Berita Pelilih Menua Kuching (KDJA), Gerempung Pengarang Berita Sibu (SJA), Palan Pengarang Berita Rejang ( IRJ) enggau Gerempung Pengarang Berita Utara Sarawak (NSJA).