Sarawak patut merejuk nyapai ekonomi digital
Kitai meseti inovatif ngubah ekonomi konvensional ngagai ekonomi digital ngambi enda tinggal ba belakang
BINTULU: Sarawak diatu majak nyingkang nuju pemansang nengah pengawa bejalaika mayuh program ungkup rayat dikena nyungkak ekonomi nengeri tu seraya fokus ngagai ekonomi digital nyengkaum mantu bala anak Sarawak nyapai penyulut ba sukut pelajar, tranformasyen betanam betupi, numbuhka sekeda serikat dalam ngatur ekonomi sereta nagih hak Sarawak ari perintah besai.
Kepala Menteri Datuk Amar Abang Johari Tun Abang Openg madah, batang pekara dikemerat dalam ekonomi digital ungkup nengeri tu nyadi komoditi ke pemadu berega ukai semina minyak tang penerang nengah Majalah Economist ti madahka penguntung serikat Amazon Dot Com, Facebook enggau Microsoft ba suku keterubah 2017 iya nya USD25 bilion.
Ku iya, kitai meseti inovatif dikena ngubah ekonomi konvensional ngagai ekonomi digital lalu kitai patut merejuk ngambika kitai enda tinggal ba belakang.
“Bisi orang betanya ngagai aku, ulih enda kitai merejuk ari Industry 2.0 ngagai Industry 4.0? Ba penemu aku kitai enda ulih nyingkang belubah agi tang patut merejuk’.
“Nya kebuah aku udah ngelancharka atur ke besaibesai ngambika Sarawak ulih merejuk nyapai tuikas ekonomi digital dalam timpuh 10 tauka 20 taun ke deka datai,” ku iya.
Iya madah munyi nya rambau pengerami ngintu Hari Kebangsaan Renggat Nengeri Sarawak ba Laman Dewan Suarah Bintulu kemari.
Pengerami tu berengkah pukul 6.30 pagi lalu ditutup enggau pengawa begempuru enggau bejalai bebala mayuh ti dipenyadika Tuai Pemegai Menua (TYT) Nengeri Tun Pehin Sri Abdul Taib Mahmud enggau bini iya Toh Puan Datuk Patinggi Ragad Kurdi Taib.
Bela datai bini Kepala Menteri Datin Amar Dato Juma’ani Tuanku Bujang; tiga Sapit Kepala Menteri, Datuk Amar Douglas Uggah Embas, Tan Sri Datuk Amar Dr James Jemut Masing enggau Datuk Amar Awang Tengah Ali Hasan.
Bala bukai ke datai iya nya Menteri Utiliti, Dato Sri Dr Stephen Rundi Utom ke nyadi menteri pengatur besai pengerami nya, Sekretari
Nya kebuah aku udah ngelancharka atur ke besai-besai ngambika Sarawak ulih merejuk nyapai tikas ekonomi digital dalam timpuh 10 tauka 20 taun ke deka datai. Datuk Amar Abang Johari Tun Abang Openg Kepala Menteri Sarawak
Perintah Nengeri Sarawak Tan Sri Datuk Amar Mohamad Morshidi Abdul Ghani sereta bala menteri kabinet nengeri ke bukai.
Kepala Menteri madah, juluk kitai ke deka numbuhka ekonomi digital patut disukung enggau perengka internet ti mungkur semua endur.
Iya madah, Perintah Nengeri udah nyendiaka belanja RM1 bilion dikena ngemanahka perengka Internet di serata nengeri ngambika servis Internet ulih besambung ngagai selampur Sarawak nengah pengelaju manggai 4 Terabit sesaat ba arus besai tauka `back haul speed’ enggau pengelaju manggai 100 megabit sesaat ungkup genap sepintu bilik.
Nengah belanja RM1 bilion tu ku iya, kitai deka bebendar nambahka penyampau tiang telekomunikasyen manggai 5,000 iti ari 1,200 ke bisi diatu.
Ku iya, sebedau ngelancharka data, kitai patut bisi undang- undang ti dikena dalam bekunsi data enggau pasal lumur.
“Aku deka mantaika Sarawak Ordinan Multi Media kena bulan November tu ila ba Aum Kunsil Nengeri ti deka dikena ngatur semua pekara pemansang digigal di nengeri tu, nyendiaka penumbuh Kaunsil Media Multi- Media ( SMA) kena Januari taun baru,” ku iya.
“Aku pechaya kitai bisi pengereja pengawa ke landik ke ulih nulung kitai nyapai juluk tu. Mayuh rayat Sarawak ke pandai, nyengkaum sida ke benung ba menua luar,” ku iya.
Iya madah, kitai mega deka ngelatih sereta mantu bala nembiak rebak baru ba pekara inovasi digital lalu kena Hari Satu ke udah aku udah ngelancharka Hub Inovasi Tegas Digital di Kuching ke nyadi penyungkak ngagai penumbuh sebengkah Kampung Digital di Samajaya Kuching manggai taun 2020.
Ku iya, kitai mega deka nganjung orang belajar dalam mayuh penemu ba renggat master degree enggau Phd ba universiti pansik tebilang ba Malaysia enggau menua luar.
“Yayasan Sarawak deka nyendiaka duit jali enggau sekularship ke tuju tu laban kitai ulih ngumpul mayuh belanja pengudah premium kayu niki ari ari 80 sen ngagai RM50 semeter.
“Yayasan Sarawak melabaka penatai pemisi manggai RM300 juta setaun ari premium kayu dibanding semina urung RM20 juta sebedau tu. Nengah nya ngujungka penatai pemisi ke diulih Yayasan Sarawak ungkup pekara pelajar diatu mega mayuh iya nya manggai RM100 juta dibanting enggau semina RM9 juta sebedau tu,” ku iya.
Iya madah, kitai udah begulai dalam Perintah Besai pengelama 54 taun lalu bejalaika mayuh atur dikena ngemansangka Sarawak awakka sebaka maju enggau nengeri bukai.
“Pengawa ngaga Jalai Besai Pan Borneo benung dikemujur berengkah ari Telok Melano ba Sematan nuju je Miri lalu besambung ngagai Limbang enggau Lawas endang nyadi Projek Pemansang pemadu besai digaga Perintah Besai ba nengeri tu dalam timpuh 54 taun dalam ngangkatka pemansang ba negeri Sarawak,” ku iya.
Ku iya, diatu mih maya endur kitai nyingkang ngambika nengeri tu ulih sebaka maju enggau nengeri-nengeri bukai.
Abang Johari mega madah, nya kebuah kitai bejalaika sekeda inisiatif ngambika sarawak ulih jampat nyingkang nengah penumbuh Bank Pemansang Sarawak (DBOS) dikena melanja sekeda projek strategik, nyengkaum ngemanahka lebih 1,000 sekula buruk ba serata nengeri Sarawak sereta numbuhka serikat minyak enggau gis iya nya Petroleum Sarawak (PETROS).
“Aku nemu penumbuh PETROS meri pengaga ngagai bala anak Sarawak, sekalika nya dalam tauka luar menua tu. Tu siti kelai ke manah mandangka peranak Sarawak nyukung penumbuh PETROS ke nyadi serikat minyak Sarawak baka PETRONAS ke nyadi serikat minyak enggau gis nasional.
“PETROS deka dipegai bala profesional ari raban anak Sarawak empu ti ngembuan mayuh peneleba dalam industri minyak enggau gis laban Sarawak patut regas ba industri pemungkal minyak enggau gis lalu enda ibuh nganti pemutus penemu ari Perintah Besai baka pengawa minta nikika royalti minyak ari 5 peratus ngagai 20 peratus,” ku iya.
Nya alai, ku iya Bintulu benasib amat laban nyadi palan industri minyak enggau gis Sarawak kelimpah bisi bandar satelit Samalaju sereta nyadi palan industri Koridor Kuasa Dikena Baru Sarawak (SCORE).
“Kitai keran meda Bintulu nyadi hub industri gis di Sarawak. Sebuah loji methanol deka digaga enda lama agi ba Tanjung Kidurong nengah sebuah serikat dipenggi nengeri tu empu lalu nya seraris enggau juluk meda Bintulu nyadi palan industri gis.
“Kitai udah mujur ngambi Tekat Hidro Bakun nengah rega ke numbas iya ari Perintah Besai. Nengah kuasa penuh ari Bakun, kitai arap bendar kuasa karang ba nengeri tu ulih diatur enggau manah ke pemaik pemansang industri baka di Samalaju,” ku iya.
Ku iya, bidang betanam betupi mega begunaka pengeransing dalam ngubah iya nyadi pengawa moden, bisi asil besai enggau digital.
“Sarawak patut nyadi pengeluar produk pemakai ngambika ulih ngemansangka industri betanam betupi ke endang nyadi juluk kitai laban penyampau diselinting kitai iya nya rayat Asia ke manggai lebih 3 bilion,” ku iya.