Pemayuh produk pemakai peluang manah ungkup pedagang
MIRI: Projek nangkir Jalai Tudan sepemanjai 3.5km ngagai empat lurung beungkus RM42 juta dipelaba tembu dalam bulan September tu ila.
Menteri Muda Dagang Temuai, Seni, Main Asal, Datuk Lee Kim Shin madah naka diatu pengawa nangkir jalai nya udah manggai 88 peratus tembu.
“Tu nulak peragam mensia mayuh ti ngumbai projek tu tejanggal tauka laun ari perambu asal, taja pia aku nyemetak madah, jalai tu deka tembu dalam bulan September tu ila,” ku iya rambau ngatur pejalai gawa ngabas taba projek tu, apin lama ke udah.
Lee ke mega Kaban Kunsil Nengeri (ADUN) Senadin madahka projek tu udah berengkah digaga dalam bulan Febuari taun nyin tadi lalu ukai nya dalam taun 2015 baka ti disebut sebedau tu.
“Pengudah tiang elekterik dientak lalu didiri ba sepemanjai jalai ditu, ke alai Jalai Tudan tau dibuka ngagai mensia mayuh dalam bulan Oktober ila,” ku iya nerang.
Lee ngerah Opis Kereja Raya (JKR) ngenyampatka agi kereja ngemesaika jalai nya ngambika iya ulih tembu tumu agi ari perambu asal.
Iya mega puas ati enggau pekara bukai nyengkaum isu beserak paip dalam tanah diempu kompeni perengka guna ti udah mujur diputar.
Nitih ku iya, projek ngemesaika jalai dua lorong ngagai empat lorong nyadi sekeda ari projek dianti peranak Tudan enggau kandang ngelingi.
“Jalai tu bisi seiti jalai keliling seraya tetiap lorong jalai dibuka besai agi ungkup pengelantang mensia mayuh ti sebedau tu suah sebanaka jalai sekut maya jam orang nurun enggau pulai gawa,” ku iya.
Ninting hari jalai nya kelalu sekut kelebih agi ari pukul 6 ngagai pukul 8 pagi, pukul 12 tengahari nyentuk pukul 2 lemai lalu ari pukul 5 lemai dataika pukul 7 malam.
Sebedau tu, jalai nya semina bisi dua lorong mit lalu iya deka sekut agi maya bisi penusah bebadi nyadi. SARIKEI: Industri bepelasarka pemakai ngembuan peluang enggau bisi pengelebih dikemansang nyema dipejalaika memanah sereta pintar ngena semua pengelebih ke bisi ngelingi orang ti ngereja iya.
Kaban Parlimen ( MP) Tanjung Manis, Datuk Hajah Norah Abdul Rahman madah pengelebih enggau pemayuh produk pemakai di nengeri tu nyadi seiti peluang pemadi manah nyadika pelasar ngemansangka industri pemakai berindik ari penyampau peminta produk pemakai majak nambah.
“Dikena nentuka juluk tu dijapai, pengeran, pengepuh, kreativiti enggau sedia napi sebarang pemar patut bisi dikembuan orang ti deka nyadi orang dagang mujur dalam bidang tu.
“Nyema deka teulihka pemujur dalam bidang tu, orang tu meseti bisi ati rindu ngaul diri sereta lurus ati,” ku Norah lebuhka bejaku ba atur Pengawa Ngelanjarka Festival Pemakai Sarikei 2017, apin lama ke udah.
Program tu udah diatur bepalan ba palan paking kerita Wisma Jubli Mutiara lalu udah digulu urung 200 iku pengusung.
Berebak enggau nya mega, Norah meransang komuniti berunding sereta ngiga penemu pemadu engkeman dikena nempa ikon pemakai ti tau diangkat di bagi menua Sarikei, seriris enggau identiti nyadi ‘Food Basket of Sarawak’ tauka Gudang Pemakai Sarawak.
“Dataika sehari tu, Sarikei apin bisi identiti pemakai kediri empu ke tau dikaul enggau bagi menua tu ti tebilang enggau nanas.
“Kitai ngarapka dudi hari Sarikei bisi identiti ke tau dikelala mensia mayuh. Ambika chunto, Kota Samarahan ti tebilang enggau kek lapis iya.
“Nya alai, kitai dekaka Sarikei mega bisi identiti pemakai ti tebilang di menua tu, dikerindu tetiap serak komuniti,” ku Norah.
Norah mega madahka pengawa nyungkak penatai pemisi orang dagang mit di bagi menua tu terus dipejalaika perintah nengah bemacham program.
Tandu iya, pedagang patut ngena peluang ti disediaka enggau memanah dikena nambahka penatai pemisi.
Ku iya, Sarikei bisi pengelebih kediri empu nyadi pemansut produk betanam betupi Sarawak.
“Nya alai, perintah udah lalu benung bejalaika bemacham inisiatif nyengkaum ngaga rentayan infrastruktur Teknologi Pemadah enggau Arus Penyambung ( ICT) ngambi orang bumai muntang nyual sereta nambahka pe- mansut produk sida.
“Pengawa tu nyeruyut pengawa perintah nentuka produk di bagi menua tu dijual ngagai makit luar Sarawak,” ku iya.
Program dirichah enggau bemacham atur pengawa. Sekeda ari nya pengawa ngelakuka pemakai enggau pemakai asal, pekit nyumpit, autoshow, pelanda ungkup pengerai, pekit berapi enggau pengawa mandangka busking.
Sama bisi datai Chairman Kaunsil Pelilih Sarikei, Wong Zee Yeng, Residen Bagi Menua Sarikei, Mohd Junaidi Mohidin enggau Pemangku Pemesai Pelilih Sarikei, Badjuri Bidin.