KDC mujur ngatur program begulai enggau mensia mayuh di Ng Latong

KAPIT: Opis Kaunsil Pelilih Kapit (KDC) mujur ngatur renggat ketiga Program Pemansang Modal Mensia enggau Rampa Menua Begulai Enggau Komuniti di Rumah Melayu Anak Angkup, Nanga Latong Sungai Tekalit, anak sungai Katibas, bedau lama ke udah.

Sapit Menteri Pemansang Menua Pesisir enggau Kandang Menua Malaysia, Datuk Alexander Nanta Linggi ke mega Kaban Parlimen (MP) Kapit udah bejadika program nya.

Program sama ti keterubah udah diatur di Rumah Ansie at Nanga Sepajie, Mujong, pengujung bulan Mac, lalu program kedua di Uma Kelab, Skim Pengentap Baru Pendiau Bakun, Sungai Asap dalam tengah bulan Mei taun tu tadi.

Sekeda aktiviti ke bisi dipejalai nyempulang program tu nyengkaum pengawa ngasap nyamuk, licha begulai enggau tujuh bengkah ejensi perintah baka ke diatur KDC, Komiti Rampa Menua enggau Pemansut Asal Sibu, Bomba Song, Opis Pelilih Song, Opis Polis Song, Opis Pengerai enggau Opis Pengerejista Bansa Song, enggau pengawa mandangka chara ngerara api, pengawa beripai meresi kandang ngelingi rumah panjai, pengawa nanam paung kayu, pekit nyura nembiak mit sereta sukaneka.

Sama bisi datai ngulu program Sekretari Politik Kepala Menteri Tapah Ata, Pemesai Pelilih Song Jackline Bte August, Sapit Ketuai Kunsil Opis Pelilih Menua Kapit Kuansilor Lawrence Listin Baling, Penulung Sekretari kaunsil, Kelimbik Sibat, bala ketuai mayuh bengkah opis perintah di Pelilih Song, Pemancha Edward Jamit Untam, Penghulu Ajut Dingin, sekeda bala kaunsilor ari opis kaunsil, bisi 16 iku ketuai tumpuk pendiau di Sungai Tekalit sereta urung 350 iku peranak rumah panjai enggau temuai ke bisi dikangau.

Kaunsilor Lawrence Listin Baling meri terima kasih ngagai Komiti Pemansang Enggau Pengelikun Genturung Pendiau (JKKK) Rumah Melayu laban sida ngemendarka ngatur program ti nyediaka peluang ngagai peranak menua pesisir ngaul rat amyuh bengkah ejensi perintah sereta pengari rayat di menua tu.

Iya minta ampun ngarika Ketuai Kunsil Opis Pelilih Menua, Philimon Nuing enggau Sekretari Kaunsil, Jabang Juntan, ti enda ulih ngenataika diri rambau program nya ketegal ngulu aum di Opis Kaunsil Kandang Menua Sarawak di Kuching, ti berebak hari.

Ngelansa pasal program nya, ku Lawrence, opis kaunsil udah merambu ngatur program ba enam sitak bepilih kaunsil nengeri di Bagi Menua Kapit iya nya di Katibas, Bukit Goram, Pelagus, Baleh, Belaga enggau Murum.

Berebak enggau program nya ngarika piak kaunsil, Lawrence ngemendarka agih belanja ari kaunsil sepenyampau RM12,000. Ari penyampau nya, RM10,000 diungkupka JKKK seraya RM2000 agi dikena nyaup JKKK ngatur program nya.