Semua JKKK patut seruran nyaga pengelikun rumah panjai: Harden
Kelebih agi dikena nyeliahka penusah angus ke suah nyadi di negeri tu
SRI AMAN: Menteri Muda Pengelantang Komuniti Sarawak, Datuk Francis Harden Hollis ngansak kaban Komiti Pemansang Enggau Pengelikun Genturung Pendiau ( JKKK) di serata nengeri ngambi ngemeratka pekara pengelikun rumah ari baruh pegai sida empu ari dikeruga penusah angus.
Nitih ku iya, endang patut semua peranak ba JKKK bekerejasama matau sebarang aktiviti ti tau ngasuh penusah angus nyadi.
“Nya alai, kitai ngarapka sida ke diau di tumpuk pendiau, genturung pendiau sereta peranak rumah panjai ngambi numbuhka Komiti Nagang Penusah Angus di rumah sida empu.
“Ukai semina nya aja, aku deka ngigatka bala apai indai ti bisi anak mit di rumah ngambika matau semua pengawa bala anak sida nentuka enda bemain enggau machis sereta kereban ti tau ngasuh penusah angus nyadi,” ku iya.
“Nyema apai indai ilap meda pengawa bala anak sida, ukai semina ngeruga pengelikun bala anak ke diau di rumah aja, tang mega tau ngasuh semua kitai betapi enggau penusah,” ku iya nyemetak.
Iya ke mega Kaban Kunsil Nengeri (ADUN) Simanggang mansutka jaku nya rambau bejaku ba Pengerami Ngiling Tikai 2017 di Rumah Resa, Empelanjau Bakong, Sri Aman semak ditu, bedau lama.
Ku iya, pengawa numbuhka Komiti Nagang Penusah Angus beguna endar laban tau nyadi raban ti gawa matau sebarang pun penusah angus.
Iya mega ngansak ngambika peranak minta bantu Opis Bomba enggau Penyah Penusah sereta bemacham ejensi perintah ke bukai bejalaika bemacham program latih bekaul enggau pengawa nagang penusah angus.
Ku iya, epnagwa ke bansa tu ulih meri latih ngagai peranak matau sereta nagang penusah angus ari ngaguska semua rumah sida.
“Pengawa berumah begunaka awak ti panjai, tang chukup rugi lebuh rumah kitai angus pia aja, nya alai, sebedau penusah tu nyadi, kitai meseti tumu bejalaika pengawa ti patut,” ku iya silik.
Sama bisi datai Pemesai Kanan Bomba II, Jabatan Bomba enggau Penyah Penusah Bagi Menua Sri Aman, Jilin Itar, Pemancha Lee Siang Hua, Penghulu Tinggi Nyandang, Sapit Chairman Kaunsil Pelilih Sri Aman (MDSA), Kaunsilor Andar Suntai, Ketuai Indu Parti Sa’ati Rayat Sarawak ( SUPP) Simanggang, Ling Siew Hung, Chairman Parti SUPP Cawangan Lingga, Kapitan Kuek Aik Seng sereta bala bukai.
Berebak enggau pengerami nya, Harden mega ngemendarka agih belanja penyampau RM5,000 enggau RM3,000 ngagai JKKK Rumah Resa, Empelanjau Bangkong seraya RM5,000 enggau RM3,000 mega diungkupka ngagai JKKK Rumah Langaw, Jongkong Panjai ti udah dituntung penusah angus dalam pun taun tu tadi.
Harden mega bisi nyuaka duit belanja sepenyampau RM400 ngagai 20 iku nembiak mit ari Tabika Tunas Harapan, Tanjung Bijat Sri Aman sereta wang saguhati RM250 ngagai Raban Gendang Pampat Rumah Resa, Empelanjau Bakong.
Pia mega Harden bisi nyuaka lima unit perengka pengerara api ngagai JKKK Rumah Resa, Empelanjau Bakong, Sri Aman.
Nya alai, kitai ngarapka sida ke diau di tumpuk pendiau, genturung pendiau sereta peranak rumah panjai ngambi numbuhka Komiti Nagang Penusah Angus di rumah sida empu. Datuk Francis Harden Hollis Menteri Muda Pengelantang Komuniti Sarawak