PMS endang patut dikemanah ngambi seruran ditapatka temuai
SIBU: Pengudah ditumbuh lebih 44 taun, Pasar Malam Sibu (PMS) patut digaga manah agi ngambika seriris sereta seruran nyadi palan ditapatka temuai di mengeri tu.
Menteri Dagang Entarabansa enggau E-Dagang, Dato Sri Wong Soon Koh madah, Pasar Malam Sibu ditumbuh kenyau ari taun 1973 lalu diatu udah manggai 44 taun.
“Taja pia, kenyau ari nya, pasar malam tu meruan baka nya lalu sida ti bedagang agi ngereja pengawa ke sama baka ke suba.
“Pasar malam tu endang nyelai lalu udah datai maya endur kitai gaga iya manah agi,” ku iya madah ngagai pengarang berita, malam kemari.
Wong dirandau pengudah bejadika Pengerami Pasar Malam Sibu enggau Genap Taun ke- 40 Gerempung Serakup China (UCA) Sibu Beserimbai enggau Taun Nemuai Ke Sibu 2017 di taba Pasar Malam Sibu.
Sama bisi datai Kaban Kunsil Nengeri (ADUN) Dudong ke lalu nyadi Chairman Kaunsil Mengeri Sibu (MPS), Datuk Tiong Thai King, Chairman UCA Sibu, Kong Hian Khim, Chairman Serakup Bedaja Pasar Malam Sibu, Wong Toh Seng, Chairman Komiti Pengatur, Ting Chek Sing sereta bala bukai.
Menteri Wang Kedua nya mega madahka, Pasar Malam Sibu patut ngembuan rampa baru sereta ditambah enggau perengka ti moden agi, inovatif sereta rampa kelingi ti kondusif ukai semina ungkup sida ti bedaja aja tang mega ngagai pengusung.
“Pasar malam tu seiti ari palan ti narit ati di Sibu. Di serata Sarawak, semina Sibu aja mengeri besai bisi pasar malam ti ulih nangkup semua peminta peranak menua nya sereta mega bala temuai.
Ngelansa pasal perambau Kaunsil Servis Komuniti (LPK) Parti Rakyat Bersatu (UPP) Sibu ti datai enggau rekaan moden ungkup pasar malam nya, ku Wong, perambu tu endang manah endar sereta setipak enggau maya iya.
“Tu deka tipan jerita baru ngagai Pasar Malam Sibu. Aku minta ngagai piak MPS ngambi berunding baru ke perambu nya. Piak MPS enda ibuh ngeluarka sebarang belanja laban deka ditanggung piak kunsil.
“Nyangka MPS bisi perambu ke manah agi ungkup pasar malam tu. Tang ba aku, tu seiti perambu ti manah endar ari KPK UPP Sibu ti tau diambi dikena ngubah imej Sibu,” ku ADUN Bawang Assan nya.
Nitih ku penerang, perambu LPK UPP Sibu kena meri rampa baru ngagai Pasar Malam Sibu sebedau tu enggau belanja manggai RM1.5 juta ngagai RM2 juta udah ditulak piak kunsil.
Rekaan rampa baru Pasar Malam Sibu tu digaga piak arkitek ke sama sida Universiti Kolej Teknologi Sarawak (UCTS).