UPP Pujut deka ngelawa 16 sitak dikena ngempit kaul enggau rayat
MIRI: Tim Gawa Mindah Kin Kitu (MAT) Parti Rakyat Bersatu (UPP) Pampang Pujut deka bejalai pengawa ba 16 bengkah endur di sitak Kunsil Bepilih Nengeri (DUN) Pujut dalam timpuh enam bulan nyadi chara ngaul diri semak agi enggau mensia mayuh.
Chairman tim tu, Bruce Chai berkata, inisiatif dikearap ulih negutka agi tanggam kaul parti enggau 100,000 peranak di DUN Pujut nengah servis enggau aktiviti pengelantang sida.
Sitak DUN Pujut ti mungkur Pelita, Krokop, Piasau Jaya, Piasau Utara, Pujut 1 hingga 10, Faradale, MDL Garden, Desa Sri enggau Boulevard.
“Kitai udah netapka atur dini lalu kemaya deka bejalai gawa ngagai serap Pujut dalam timpuh setengah taun ari diatu. Tu meri pengelantang ngagai peranak ngambika sida muntang ngelawa kitai,” ku terang iya.
Palan servis mindah kin kitu parti tu berengkah gawa di restoran 2020 di Palan Bebelika Barang Pelita kemari iya nya kelai pengawa ngelancharka iya ditu.
Bruce madah, MAT nengah projek pemungkal UPP Pujut dikearap ngambika ditunda sereta nyadi chunto pampang UPP ke bukai diserata Sarawak.
Bisi lima iku kaban ny- engkaum dua iku volunteer enggau iya empu deka ngatur pengawa ti deka diatur kena Hari Enam enggau Hari Minggu, pengelama dua ngagai tiga jam.
Palan ti dipilih iya ke suah ditapatka peranak Miri iya nya Madam Wee Cafe Krokop 3, Liang Heng Cold Drinks Krokop 5, Sin Yakin Food Centre Jee Foh 4, Yong Le Cafe Boulevard Commercial, Old House Krokop 9, Miri Resort Food Court Bulatan Commercial, Pasar Besai Krokop 10, restoran Aseanika Saberkas Commercial, Taman Bulatan Miri, Jack Food Court Piasau Utara 4, Pasar Nelayan Piasau Utara 1A, Baidurie Cafe Piasau Utara 4, Happy Dragon Cafe Muria 6 Pujut 2B, Xian Jin Cafe Pujut 7 enggau 59 Street Cafe Sevenew Pujut 7.
“Pengawa tu deka diatur muakka pagi enggau lemai bepanggai ngagai operasyen dagang permis ti dikena kami. Kitai deka madah tumu ngagai mensia mayuh nengah media rama Facebook enggau surat berita sentang atur endur enggau jam iya,” ku iya nerang.
Kelimpah nerima sebana, nengah MAT, UPP Pujut deka meransang raban nembiak rejista nyadi pengundi baru sereta 26,000 pengundi di Pujut nerima penerang pemadu baru dini sida ngundi.
Peranak mega tau ngulihka penerang pasal wang turu pelajar UPP, aktiviti pengelantang UPP, meri lalau sentang pekara bekait Gerempung Pengelikun Rama (PERKESO) enggau Kumpulan Wang Simpanan Pekerja (KWSP).
“Ripot ti diterima deka dirikot lalu peranak tau nanya pejalai atur pengawa pemadu baru ba sebana sida. Kitai ngemeratka tiga pekara iya nya konsistensyen, komprehensif enggau pengeliat ati,” pia ku Bruce.
Sebarang tanya pasal MAT tau betelefon terus nuju hotline WhatsApp 0138858888.