Aset perintah nengeri ditambah
KUCHING: Perintah nengeri udah nerima semilan perengka pengangkut ti nyengkaum lapan lori lima tan berega urung RM5.3 juta sereta sebuah bot berega RM640,000 ari Perintah Besai, kemari.
Sapit Kepala Menteri, Datuk Amar Douglas Uggah Embas madahka nya dikena mantu Komiti Mutarka Penusah Ngenyit Nengeri Sarawak ngenegapka pengawa maya betapi enggau penasah baka bah enggau ke bukai di nengeri tu.
Iya ke nyadi chairman Komiti Mutarka Penusah Ngenyit Nengeri Sarawak, madahka diri minta sereta berunding enggau Perintah Besai ngambi nambahka baru aset ke udah bisi nya.
“Tu diberi Perintah Besai dikena mantu Komiti Mutarka Penusah Ngenyit Nengeri Sarawak Sarawak nambahka aset sereta dikena ngenegapka raban nya ngambika kitai ulih napi sebarang penasah tauka penusah dikena mantu orang ke tasah maya dituntung penusah bah tauka penusah ke bukai.
“Kitai ngarap sereta perintah nengeri deka minta baru ambis nadai empat buah agi lori ti baka tu ngambika tetiap bagi menua di Sarawak bisi sebuah lori. Aku ngarapka kitai enda leju berandauka pekara tu enggau renggat Kuala Lumpur.
“Kebuah pia laban kitai deka ngenegapka raban kitai ba renggat bagi menua sereta pelilih menua ngambika ulih nyikap diri napi enda ngira nama penusah tauka pena- sah,” ku iya.
Uggah mansutka pekara nya lebuh dikerandau raban pengarang berita, pengudah ngarika perintah nengeri nerima aset baru nya ba atur pengawa nyerahka perengka pengangkut operasyen enggau logistik ngagai Angkatan Pertahanan Awam Malaysia (APM) ba Pusat Pertahanan Awam Malaysia Sarawak ditu, lemai kemari.
Berebak enggau tu, Uggah ngarika perintah nengeri enggau Komiti Mutarka Penusah Ngenyit Nengeri Sarawak beterima kasih ngagai YAB Menteri Besai Datuk Seri Najib Tun Razak, YAB Sapit Kepala Menteri ti mega Chairman Komiti Mutarka Penusah Ngenyit Menua, Dato Sri Dr Ahmad Zahid Hamidi enggau Menteri ba Opis Menteri Besai Datuk Seri Dr Shahidan Kassim ke udah ngemujurka bantu nya.
Bejaku baru, iya madahka Sarawak amat begunaka perengka pengangkut nya laban bisi sekeda menua di Sarawak tusah nadai penyambung tauka tusah deka dilawa, tang semina ulih dilawa nengah sungai aja.
Penanggul kedua di Sarawak, sekeda menua ulu nadai ulih ngena telefon lalu tusah amat deka nanya berita ke nyadi, ke diatu ba kandang menua nya semina ngena radio amatur lalu kitai deka berandau enggau Opis Bomba pasal pekara tu, ku iya.
“Bepelasarka penelaba kitai perintah nengeri di kandang menua ulu baka di Miri, kitai enda tau enda sedia nyuwa perau tauka bot ti pemadu besai laban kandang menua ke endur ngajung pemakai nya jauh,” ku iya.
Nambahka nya, lebuh ditanya penyampau bantu ke udah diberi Komiti Mutarka Penusah Ngenyit Nengeri Sarawak dalam taun 2017, Uggah madah naka ke diatu bisi 175 ruang bilik (KIR) ti pindah maya bah udah diberi Duit Bantu Pengasih ke sepenyampau semua RM78,500.
Udah tu kitai mega deka meri Duit Bantu Pengasih ngagai 1,543 KIR lalu tetiap KIR deka nerima penyampau RM500, ku iya.
Kelimpah ari pekara nya, Uggah ngelalau rayat nengeri tu kelebih agi ba kandang menua ti betanah kerapa, ngambika seruran bejaga berindik ari gaya hari ti enda meruan.
“Kitai deka majak nyikap diri napi sebarang penusah bah, angus enggau ke bukai ti nyadi,” ku iya.
Sama bisi datai Ketuai Pesuruhjaya APM Mejar Jeneral Dato Azmy Yahya enggau ke bukai.