Bemacham inisiatif dipejalai kena nyungkak pemansang produk bekaul enggau bioteknologi
KUCHING: Perintah nengeri udah bejalaika bemacham inisiatif dikena meransang pansik dalam bemacham sektor betanam betupi, produk asal enggau utai tanam dikena nyungkak pemansang produk bekaul enggau bioteknologi.
Menteri Muda ba Opis Kepala Menteri, Dr Annuar Rapa’ee madah nya dipejalai ba renggat ejensi enggau nengeri, baka Palan Pansik Betanam Betupi, Palan Biodiversiti Sarawak enggau MARDI nyadi perengka ngagai pemansut biologi menua enggau asal.
“Baka utai tanam pemakai, utai tumbuh ti beguna sereta mikro ungkup bejalaika pansik enggau pemansang ngena bioteknologi nambahka pemanah produk,” ku iya lebuh nyaut tanya Aidel Lariwoo (BN-Sadong Jaya) ba Hari Kedua Aum Kedua ungkup Penggal Keterubah Aum Kunsil Nengeri (DUN) Sarawak Ke-18 ditu kemari.
Nya mega ngaul gempung dalam bidang ke benung ngerembai dalam Projek Koridor Kuasa Ulih Dikena Baru Sarawak ( SCORE) enggau seiti ari pemerat bioteknologi di nengeri tu nyukung bioindustri dalam nengeri sereta pemansang betanam betupi enggau agro bioteknologi dalam kandang menua nya.
Iya mega ngemeratka agi ‘ Mukah Science Park’ ti deka bejalaika pengawa ke beguna amat ba pengawa nyediaka infrastruktur endur bejalaika pansik bepelasarka bioteknologi.
Nya deka ngemeratka produk bekaul enggau minyak sawit, produk ari kayu ramu, produk mulung, akuakultur,memproses pemakai enggau ukai barang pemakai ungkup markit halal, nyaga pengerai enggau produk asal tauka herba.
Pansik deka dipejalai nengah institusyen pelajar tinggi UNIMAS, UPM Bintulu, UiTM Kota Samarahan, Curtin Univeristy enggau Swinburne University of Technology Sarawak ke udah netapka program pansik enggau pelajar bekaul bioteknologi.