Raban bansa Kayan diperansang nunda China ba pengawa dagang
MIRI: Nyadi sebagi ari komuniti pemadu mimit tauka ketiga pemadu seranta di Sarawak, raban bansa Kayan diperansang belajarka pengawa dagang ari komuniti ke besai baka China, ngambika sida ulih mansang nyadi komuniti ti nyulut agi.
Presiden Gerempung Kayan Sarawak, Dennis Ngau madah seiti ari pekara ti pemadu manah diau di Sarawak iya nya rayat iya enggau pemanah kaul peranak Sarawak ke udah lama ditanggam enggau pangan diri.
“Berati ari pengerami baka ke lemai tu alai ngempuruka 90 peratus bansa Kayan sereta 10 peratus ti bisi datai ari komuniti ke bebida. Ngemeranka pengamat semangat 1Sarawak kitai, bala kitai udah ngagauka sida ke bukai nyadi jalai dikena kitai mantai ngagai sida pengawa dikemeranka kitai baka ti dipadah.
“Saup enggau siruka pangan ti napi penusah taja sida ari komuniti ke bebida, lalu aku endang pechaya sida mega deka baka nya. Nyadi komuniti ti likun sereta siru ba jaku, Kayan seruran ngemeranka pemanah kaul enggau peranak Sarawak ke bukai.
“Baka selama, bekunsika penemu tu chukup mantu ngenegapka kaul lalu aku endang patut diteruska kitai, nentuka semua komuniti ulih mansang begulai,” ku Dennis lebuh mansutka jaku pengelalu rambau Pengerami Makai Lemai Serakup Kayan Sarawak ke diatu ba sebengkah hotel ditu kena Hari Enam tu tadi.
Ngelansa seiti ari tuju serakup nya – dikena meransang, dulu agi ngepun, belajar sereta nyaga main asal bansa Kayan, ku Dennis ke lalu nyadi Kaban Kunsil Nengeri ( ADUN) Telang Usan madah pengawa tu baka ke udah digaga bansa China.
“Lebuh komuniti China diau mendam ba sebengkah menua, sida deka ngereja tiga pekara ke besai – nirika rumah endur besembiang, sekula dikena meri pelajar ngagai raban nembiak rebak baru sereta serakup ti deka nyaga rayat sida empu.
“Nya alai, seiti ari pengawa ke digaga serakup kitai nyengkaum nyaga pengawa asal bansa Kayan baka lumba, seni, pesaka, lagu, tanda enggau muzik, sereta mega meransang pengawa besekula ngagai bala kaban serakup enggau sida sebilik, meransang enggau meri penyedar ba aktiviti ekonomi sereta beratika pekara ti bekual enggau pengalantang raban bansa Kayan.”
Dennis mega ngena awak nya mantaika nasit peranak menua pesisir, kelebih agi sida ke diau di Ulu Baram - Kenyah, Kelabit, Berawen, Penan, La Kaput, Saban enggau ke bukai, sida ti begunaka bantu dalam pekara pemansang ekonomi, infrastruktur enggau penyikap perengka guna pemun.
“Nyadi pengari ke dipilih rayat, aku ulih madah baka sida, aku endang nganti ubah ti deka digaga perintah Sarawak nengah Program Transformasyen Menua Pesisir (RTP) iya.
“Tumpuk pendiau di menua alai penatai asal tebal agi kitai ke ditu sereta kaul agi meruan. Nya alai, aku bekunsi enggau bala bukai, alai pemansang deka datai ngagai tumpuk pendiau kitai, ngasuh pengidup lantang agi,” ku iya nyemetak.
Sekeda bala ke bisi da- tai Sapit Kepala Menteri Datuk Amar Douglas Uggah Embas, ADUN Marudi, Penguang Manggil, Kaban Parlimen (MP) Baram Anyi Ngau, Senator Datuk Lihan Jok, Residen Bagi Menua Miri Antonio Kahti Galis, Chairlady Pengatur Lahong Tajang enggau Temeonggong Elizabeth Deng ti ngetuaika komuniti Kayan di Miri enggau Baram.
Pengerami makai lemai diaku nyadi gempuru bansa Kayan pemadu besai enggau 1130 iku Kayan ari serap Sarawak nyengkaum Kuching, Bintulu, Sibu enggau sida ke datai penyauh ari Ulu Baram sereta mega sida ari komuniti ke bukai.
Tuju ngatur pengerami makai lemai tu, naka ulih ngempuru bansa Kayan dikena meri peransang ngagai pangan diri ransing ati ngangkatka ekonomi sida.