SDSPA deka ngatur Pengerami Makai Malam Keterubah kena 28 Oktober
SERIAN: Seraban orang pinchin ditu deka ngatur gempuru ti keterubah kena malam Hari Lima (28 Oktober) ungkup Pengerami Makai Malam Keterubah pengudah setaun Serakup Orang Pinchin Sarawak Bagi Menua Serian (SDSPA) ditumbuh.
Nitih ku Sapit Chairman Tukiman Saida, bala komiti pengatur udah nyediaka diri kenyau ari tiga bulan ke udah, lalu ngarapka pengerami tu dipejalai enggau mujur.
“Kitai ulih nyual 50 iti mija ngagai sida ke udah pinchin di bagi menua tu lalu tu meri peransang laban juluk kami ke bendar deka ngemai sida ke pinchin ngenang pengawa ke udah digaga kami nengah serakup tu,” ku Tukiman.
Ku Tukiman, serakup tu meri besai terima kasih ngagai sekeda piak enggau orang ngatika diri ke udah nyukung atur pengerami makai malam tu kelebih agi sida ke besetuju melanja perais chabut tikit benasit.
Iya beterima kasih ngagai Menteri Raban Nembiak, Lumba enggau Penyerakup Dato Sri Michael Manyin Jawong ke udah besetuju datai ngulu pengerami makai lemai nya nyadi temuai dipebasa.
Iya mega madahka Kaban Kunsil Nengeri ( ADUN) Bukit Semuja, John Ilus enggau ADUN Kedup, Martin Ben mega udah ngaku diri deka datai ngulu pengerami makai lemai ti deka diatur ba Balai Komuniti Serian.
Serakup Orang Pinchin Sarawak Bagi Menua Serian diatu bisi 100 iku kaban, lalu sekeda ari pemesai sida iya nya Chairman Edward Sian iya nya seiku orang ti pinchin nyadi pengajar, Sekretari Peter Musa iya nya ex-polis enggau Tukang Wang Ketuai Kaum Richard Rioi ti mega ex-pengajar.
Tukiman madahka serakup nya deka ngemeratka pengawa ngiga kaban pengudah pengerami tu laban bala komiti pechaya mayuh agi orang ke pinchin deka besetuju enggau penemu nyadi sebagi ari serakup nya pengudah sida ngatur gempuru tu.