PAWE Miri nerima gelar Volunteer Pengintu Pengelantang Pengandai Tuai ti Chakah 2016
MIRI: Palan Aktiviti Pengandai Tuai (PAWE) Miri udah nerima gelar Volunteer Pengintu Pengelantang Orang Pengandai Tuai ti Chakah 2016 beserimbai enggau Pengerami Volunteer Renggat Nengeri Sarawak 2016 ke diatur ba Kuching kena Hari Minggu nyin tadi.
Tanda basa Opis Pengintu Pengelantang Raban Bansa Sarawak (JKMNS) udah disuaka Kaban Kunsil Nengeri (ADUN) Samariang Sharifah Hasidah Sayeed Aman Ghazali ti ngarika Menteri Pengintu Pengelantang Pendiau, Orang Indu enggau Raban Bansa, Datuk Fatimah Abdullah.
Chairman PAWE Miri, Pemancha Wilson Siang Lim lebuhka dirandau kemari meri besai terima kasih ngagai perintah nengeri ti udah ngaku aktiviti enggau program orang tuai sereta saup sida dalam nempa menua bansa.
“Kitai meri terima kasih ngagai JKMNS enggau perintah nengeri tu ke udah ngaku pengawa orang tuai sereta pangku pengawa sida enggau meri tanda basa tu dikena meri peransang ngagai sida ti gawa ba palan tu,” ku Wilson.
Nitih ku Wilson, udah nerima tanda basa ari mayuh Gerempung Ukai Dikuasa Perintah (NGO) enggau palan di Sarawak ngayanka PAWE Miri udah bejalaika aktiviti enggau program ke manah ngelama tu.
Ku iya, PAWE Miri udah mai orang tuai ari semua serak pengidup regas ngaul diri dalam palan nya nyengkaum pengawa rama, lumba enggau aktiviti raban bansa.
“Tanda basa diberi JKMNS tu sebagi ari pengawa meri peransang ngagai komiti nya ransing agi gawa sereta ngatur mayuh agi aktiviti,” ku iya seraya meri terima kasih ngagai bala kaban komiti PAWE Miri.
Berebak enggau nya ku iya, sukung enggau jaku lalau ari bala pemesai Servis Pengelantang Miri meri pemujur ngagai PAWE Miri enggau mayuh kaban ari sida ke tuai nadai ngira bansa enggau jalai pengarap.
PAWE Miri, ku iya, meri basa mega ngagai Direktor JKMNS ba jaku peransang rambau pengerami makai lemai.
Ba lansa ke sama, iya ngansak semua orang tuai di Miri ulih regas agi bejalaika pengawa sereta ngaul diri dalam palan aktiviti enggau program nentuka pengelantang sida enggau pengawa sida ulih diaku.
Tanda basa diterima tu asil ari pemujur semua orang nyengkaum bala kaban komiti iya sereta sida ti nyukung palan nya ngelama tu, ku iya nambah.
PAWE Miri udah nerima setipikit, mata duit RM1,000 enggau trofi.