Tekat hidro elektrik deka digaga enti bisi peminta
Kitai udah bisi organisasyen sereta pengelandik ngemansangka kuasa hidro elektrik, ku Torstein
KUCHING: Ketuai Pemesai Eksekutif Sarawak Energy Berhad (SEB), Datuk Torstein Dale Sjotveit madahka semua projek 12 iti tekat hidro elektrik ti diperambu digaga di Sarawak ulih dipejalaika, enti nyema bisi peminta nya dikemansangka.
Iya bepenemu Sarawak deka ngeluarka produk kuasa elekterik lebih nyema bisi peminta makit ba kuasa elektrik baka ari Sabah, Brunei, Kalimantan Indonesia enggau industri di nengeri tu.
“Kitai patut ngemansangka enti nyema bisi beguna. Kitai ngaga projek nya ukai ketegal bisi perambu, kitai ngaga laban bisi makit.
“Kitai udah bisi organisasyen sereta pengelandik ngemansangka nya. Nya semina pekara ke deka dipejalaika enti bisi diguna,” ku iya lebuh ke nyaut tanya sekalika pelin ngaga 12 projek tekat hidroeletrik di nengeri tu deka dipajakka.
Torstein mansutka pekara nya dalam sesi tanya saut nyerumba atur pengawa ‘Datuk Torstein’s Meet-TheMedia-Session’ ke diatur ba Menara Sarawak Energy ditu, kemari.
Kitai patut ngemansangka enti nyema bisi beguna. Kitai ngaga projek nya ukai ketegal bisi perambu, kitai ngaga laban bisi makit. Datuk Torstein Dale Sjotveit Ketuai Pemesai Eksekutif Sarawak Energy Berhad (SEB)
Sebedau tu dalam ripot berita, tekat hidro elekterik nya deka ngasilka 30,000 MW elekterik dikena napi peminta guna industri kelebih agi industri dalam kandang SCORE.
SEB udah nembuka pengawa ngaga tekat ai Murum 944MW taun nyin kemari lalu tekat ai Bakun 2,400MW ti diempu perintah besai, udah tembu dalam taun 2010.
Nambahka nya tekat ai Batang Ai 100MW ke diempu SEB, udah tembu urung 30 taun ke udah.
Tekad ai keempat di Baleh enggau kapasiti 1,285 MW udah dikemendarka Kabinet dalam bulan Jun taun nyin kemari, dipelaba renggat keterubah projek nya deka dipejalaika taun baru.
Nitihka ripot berita, bulan Jun taun nyin kemari Kepala Menteri Datuk Patinggi Tan Sri Adenan udah nginsil pengawa ngaga tekat ai di Baram 1,000 MW dikena meri peluang ngagai pakar rampa menua enggau tekat ai antarabansa bejalaika pengawa pemansik.
Kelimpah ari nya, lebuh ditanya ba sesi tanya saut ke penudi enggau raban Media sebedau ke ngetu gawa ba SEB, bekaul enggau pengarap ati iya ngagai Sharbini Suhaili, 53, ti nyilih iya ba penuduk Ketuai Pemesai Eksekutif, iya madahka penganti iya nya orang ke chukup bepeneleba kelebih agi enggau Petronas.
Iya madahka diri enda nyain baru kontrak ti abis timpuh ujung bulan tu enggau SEB laban ti deka meri awak diri ngagai ruang bilik ke lama udah enda entu dikeibuhka iya.
“Aku enggau SEB ngambi timpuh setaun setengah deka ngelala bagi orang ke patut nyadi ketuai SEB lalu aku arap endar Sharibini orang ke digiga nya.
“Aku ngarapka iya (Sharbini) ulih beratika baru nama utai ke udah dikereja kami dalam timpuh tujuh taun ke udah. Ke manah patut digaga enggau lebih manah agi, ke enda manah patut diketuka nitihka penemu iya,” ku iya seraya madahka diri pulai ke menua asal iya di Oslo, Norway.
Torstein berengkah gawa enggau SEB kena 1 November 2009 nyentuk ujung bulan Oktober tu.
Sharbini deka berengkah nyadi Ketuai Pemesai Eksekutif SEB kena 1 November tu.