FAMA ngemendarka RM3 juta ungkup Projek Pasar Komuniti
MIRI: Opis Dagang Betanam Betupi Perintah Besai (FAMA) udah ngemendarka belanja penyampau RM3 juta dikena ngaga Pasar Komuniti ba tengah palan bebeli barang Bandar Baru Permyjaya di Tudan semak ditu.
Pengawa ngemendarka belanja tu udah dibantaika Direktor kanan FAMA, Mohd Ariffin Awang, rambau aum keterubah bala pemesai FAMA ari Selangor begulai enggau Menteri Muda Dagang Temuai ke lalu nyadi Menteri Muda Perengka Pengangkut Darat, Langit enggau Pengelikun, Datuk Lee Kim Shin enggau bala kaban Kaunsil Mengeri Besai Miri (MBM) ditu kemari.
Lee ke mega nyadi Kaban Kunsil Nengeri (ADUN) Senadin, madahka perambu ngaga Pasar Komuniti udah dibantai pengelama enam taun ke udah, taja pia semina ulih dipejalaika diatu laban bisi penanggul ba mayuh macham pekara ke enda ulih diseliah.
“Projek ngaga Pasar Komuniti tu deka berengkah bulan Mac taun baru, pengudah pengawa nasih tanah dipejalai ba taba pemesai 2.4 ekar ti diagih ungkup pasar tu,” ku iya madah ngagai pengarang berita ditu kemari pengudah ngulu aum nya ke diatur ba bilik MBM.
Nitih ku Lee, pengudah iya tembu ila, Pasar Komuniti tu deka ngembuan 100 buah lot kedai ti deka nyual mayuh macham produk tauka asil utai tanam, jelu tupi enggau asil berikan, enggau lebih 100 lot endur ngengkahka entukar bela bisi disedia, ungkup pengelantang mensia mayuh.
“Projek Pasar Komuniti udah lama dipinta, taja pia semina diatu kitai ulih bejalaika projek tu, nya alai aku udah nambahka penyampau belanja ari RM2.5 juta baka ke dipinta enam taun ke udah ngagai RM3 juta laban ungkus ti nambah nyengkaum perengka berumah kelimpah ari chaj GST (ti berengkah dipejalai April 2015),” ku Lee.
Berindik ari nya, Lee ngarapka pengudah pasar tu tembu ila, deka nambahka agi perengka guna endur bebelika barang basah enggau barang dapur ukai semina peranak ba Permyjaya enggau Tudan aja, tang mega ari kandang menua Senadin, Kuala Baram enggau kandang menua besemak.
Ba pekara ke bekaul, Mohd Ariffin lebuhka di- tanya bekaul enggau atur peminta bala orang dagang ke deka bedaja ba Pasar Komuniti tu ila, iya madahka FAMA ari baruh Opis Menteri Bumai enggau Industri Betanam Betupi Malaysia semina ngereja pengawa ngatur sereta matau pasar nya aja.
“Lalu pekara ngeluar lisin enggau peminta bedaja kitai nejuka ngagai piak MBM laban ari baruh tanggung pengawa MBM.
“Kitai pechaya peminta deka dibuka MBM sebedau Pasar Komuniti tu tembu ila,” ku iya nandu.
Nimbal tanya Lee, bekaul enggau lisin trak pemakai ke majak dikerindu diatu, Mohd Ariffin madahka FAMA Sarawak, bela nerima mayuh peminta, taja pia pengudah diserenih, semina dua aja udah dikemendar beoperasyen ba Miri berengkah ari taun baru.
Iya mega nerima perambu ari Lee ngambika mayuh agi lisin trak pemakai dikemendar ngambi ngemuntangka bala orang dagang ke nadai bangsal tang lantang agi nyual pemakai ari trak sida empu kelebih agi pemakai ti mansau tekala nya.
Taja pia ku iya, peminta patut nitihka sukat trak pemakai ke patut.
Sama bisi datai ngulu aum nya kemari Direktor FAMA Sarawak, Paza Dan enggau Sekretari MBM, Mohamad Junaidi Mohidin.