Mensia mayuh diperansang sampal ngulu Karnival Nembiak kena 10 Nov
KUCHING: Mensia mayuh diperansang sampal ngulu Karnival Nembiak: Nembiak Bepenau 2016 ke diatur Breakthrough Network Centre Berhad ke deka diatur ba MJC Batu Kawah, kena 10 November ila.
Menteri Muda Pengerai Mensia Mayuh, Datuk Dr Jerip Susil ba aum media ti digaga di opis iya di Baitulmakmur kemari, madah pengawa nya manah sereta berat ke bala nembiak ngambi nyadi orang ke seruran regas.
“Pemerat atur pengawa tu ungkup semua renggat umur, begempuru lalu meratika pengelandik enggau pengerindu sida,” ku Dr. Jerip.
Dr. Jerip ti mega nyadi ADUN Mambong madah, Perintah Nengeri deka meda nembiak begulai sereta ngaga pengawa ke dikerindu sida, ku iya.
Pengari Breakthrough Network Centre, James Lee madah atur pengawa nya entara program ke bisi dirintaika dalam Nembiak Bepenau 2016, iya nya pengawa pemerindang sereta tanda, alai ngerejista sida iya empu nya pechuma tang dibuka ngagai 10 iku penyereta ba genap kategori.
“Program manah bukai ke ulih matak ati nembiak, iya nya baka pekit ‘skateboard’, pengawa mandang motosikal bekuasa tinggi, makit nyual mayuh macham perengka guna sereta barang enggau bazaar pemakai.
Kelimpah ari nya, bisi mega pengawa pemerindang ari Tim Yoyo profesional ari Sarawak, Bayu Kenyalang enggau pengawa pemerindang ari Cosplay,” ku Lee.
Sida ke deka bejualka barang tauka pemakai, kedai mit agi bisi disediaka enggau bayar RM50 aja ke orang ke ukai korporat lalu orang korporat dipinta mayar RM100.
Atur pengawa karnival nya deka dipenyadika Dr Jerip, lalu deka mantaika seiku penyanyi Iban tebilang Gabriel Fairuz Luis, ke bedau lama tu tadi menang nyadi Penyanyi Dayak ke pemadu Nyulut.
Mensia mayuh ke deka nemu pasal atur pengawa tu enggau silik agi, tau ngiga Jadif ba lumur telefon 019-8270745 tauka Gabbie ba lumur 0128461216 tauka ngelawa facebook, www.facebook.com/ breakthrough.org.my.