Wayar elekterik ba 437 buah sekula patut ditukar
Dikena nyeliahka sekula nya dituntung penusah angus ketegal wayar sot laban udah kelalu lama
KUCHING: Wayar elekterik ba 437 buah sekula di nengeri tu patut ditukar ngena ke baru dikena nyeliahka ari penusah angus nyadi nuntung sekula nya.
Menteri Pengintu Pengelantang Pendiau, Orang Indu enggau Pemansang Ruang Bilik, Datuk Fatimah Abdullah madah, pengawa nukar baru wayar elekterik deka dipejalaika berenggat.
“Di nengeri tu bisi 437 buah sekula ti patut ditukar ngena wayar elektrik baru. Renggat keterubah deka dipejalaika ba taun 2017 iya nya bisi 110 buah sekula, lalu 51 buah ari penyampau nya deka disambung ngagai grid perintah.
Renggat kedua deka dipejalaika dalam taun 2018 ti mungkur 238 buah sekula.
“Renggat kedua deka dipejalaika dalam taun 2018 ti mungkur 238 buah sekula. Lalu ke bukai (89 buah) deka dipejalaika dalam renggat ketiga enggau keempat dibaruh Langgur Pemansang Malaysia Lumpar Ke-11 (2016-2020).
“Opis Pelajar Nengeri Sarawak (JPNS) ukai semina minta wayar elekterik sekula nya ditukar ngena wayar baru tang mega minta semua sekula di nengeri tu disediaka kereban pengerara api ti dipelabaka beungkus RM6 million. Lalu bisi sekeda kereban pengerara api nya udah abis timpuh,” ku iya.
Dulu ari nya iya mendingka licha enggau randau pasal ripot ‘ Penempatan Guru 90:10’ ke diatur ba bilik baum opis menteri nya ba Begunan Baitul Makmur ditu kemari.
Dalam aum pengarang berita nya kemari, Fatimah nerangka pasal tujuh buah sekula di nengeri tu ke angus dalam tim- puh tujuh bulan baka ke diripot dalam surat berita madahka dua buah ari penyampau nya begunan sekula ti puang tauka nadai dikena.
Iya madah, tebal agi sekula ke angus nya udah kelalu tuai lalu JPNS udah bejalaika audit ngelala bagi sekula ti patut ditukar baru wayar elektrik enggau ke bukai, dikena nyaga pengelikun nembiak sereta pengajar.
“Ke bendar dua ari tu- juh buah begunan sekula di nengeri tu ke angus nya puang tauka nadai dikena agi iya nya SK Durin enggau SK Lawas. Lima buah sekula ke bukai ti angus nya mengkang dikena.
“Bepelasarka ripot bomba ti ngaga pansik nya, empat ari lima buah begunan sekula ke agi dikena nya, angus ketegal wayar sot,” ku iya nerang ngagai pengarang berita.
Dalam taun 2016, bisi tujuh buah bangunan sekula ti kena penusah angus ti nyengkaum SMK Engkilili; SK Kapit; SMK Sungai Tapang; SK Lepong Gaat; SK Sundar Lama; SK Bario, Bario enggau lemai ensanus SK Sungai Sugai, Pakan.
Kelimpah ari nya iya madahka di nengeri tu bisi 183 ari 486 buah sekula nya dalam kategori ti pemadu jai tauka tuai, sereta patut digaga baru enggau naka pengelengkas. Tebal agi ke udah kelalu tuai tauka jai nya sekula di menua pesisir nengeri tu.
“Lalu 43 ari 183 buah sekula ke dalam kategori pemadu jai tauka kelalu tuai deka digaga baru enggau naka pengelengkas, lalu berindik ari nya kitai ngaga begunan sementara ngena chara IBS.
“IBS tu ke bendar kena sementara aja laban semina ulih tan dalam timpuh 15 ngagai 20 taun,” ku iya.
Sama bisi dalam aum pengarang berita dua Menteri Muda iya, Dr Abdul Rahman Ismail enggau Sharifah Hasidah Sayeed Aman Ghazali.
Opis Pelajar Nengeri Sarawak (JPNS) ukai semina minta wayar elekterik sekula nya ditukar ngena wayar baru tang mega minta semua sekula di nengeri tu disediaka kereban pengerara api ti dipelabaka beungkus RM6 million. Lalu bisi sekeda kereban pengerara api nya udah abis timpuh. Datuk Fatimah Abdullah Menteri Pengintu Pengelantang Pendiau, Orang Indu enggau Pemansang Ruang Bilik