Naka kediatu, nama chalun SUPP lalu bedau dibantai

KUCHING: Parti Sa’ati Rayat Sarawak (SUPP) patut udah mantaika nama chalun sida iya ke ulih dikearapka menang ba sitak Batu Kawah beserimbai enggau Pengawa Bepilih Nengeri (PRN ke-11) ti disadang deka diatur dalam kandang sebulan,dua tu.

Naka ke diatu, bedau siti nama udah dibantaika tang semina diperita parti nya udah bisi chalun dalam dua, tiga iku.

Chairman SUPP pampang Batu Kawah, Lo Khere Chiang mega bisi didinga rita deka nyadi chalun ba sitak nya maya PRN 11 tu ila madah, iya nyerahka sebarang pemutus nya ngagai tuai pemesai parti sereta Barisan Nasional (BN).

“Aku nyerahka pemutus nya ngagai parti, laban aku pan enda ulih amu, milih ni bagi kerusi ke tau endur aku.

“Nya alai, awakka parti mutuska pekara nya, lalu ngarapka parti (SUPP) ulih ngaga pemutus enggau jampat lalu enda kelalu laun mantaika nama,” ku Lo.

Iya madah munyi tu lebuh dikerandau pengudah nemuai ngagai ruang bilik orang seranta di Batu Gong, Siburan ditu, kemari.

Ku iya baru, chalun ti bepeluang ulih menang patut dipadahka jampat.

“Aku siku ari chalun nya, chalun ke dipelaba ulih menang. Nya alai, manah parti mantaika nama enggau jampat ngambika kami tauka aku empu ulih bejalai ngagai sitak ke deka diasuh sida iya bediri,” ku iya.

Taja pia, ketegal penyarut entara SUPP enggau United People’s Party (UPP) bedau diputarka enggau manah nyentukka sehari tu, bedau bisi sebarang pemutus udah digaga, sapa bagi chalun ked- edua parti nya deka bediri ba sitak ke patut, Lo ngarapka pengelandik Kepala Menteri Datuk Patinggi Tan Sri Adenan Satem ngatur chalun nya ila.

“Aku bebasaka Kepala Menteri lalu aku nemu pasal pengelandik iya, penyarut tu deka diputarka. Taja pia, baka sitak Batu Kawah, sigi udah bisi chalun ke bepeluang menang,” ku iya.

Dua iku agi chalun ti didinga berita disadang deka dirintai nyadi chalun ke ulih menang maya PRN 11 tu ila, iya nya Presiden SUPP,Senator Datuk Dr Sim Kui Hian enggau ex-chalun Batu Kawah suba, Tan Joo Phoi ke alah besatup enggau ADUN ari Parti Tindakan Demokratik (DAP) ba PRN- 10 suba.

Lo mega ngenang pengawa SUPP ke udah lama ba sitak Batu Kawah, madahka parti nya udah mayuh sejarah ari pemungkal kelia di Batu Kawah.

“SUPP udah ngaga mayuh macham pemansang dalam beberapa taun tu ke udah di sitak Batu Kawah kelebih agi nyukung pelajar China sereta SUPP mayuh udah mantu ngaga sekula China.

“Baka aku ke nyadi Injinir Sivil, kenyau Datuk Alfred Yap agi nyadi ADUN Batu Kawah, pemadu mimit 7 ngagai 8 buah sekula China, aku empu ti ngelangkar sekula nya dibantu Yap enggau bala bukai nyengkaum minta belanja ngagai Perintah,” ku iya.

Ketegal SUPP udah mayuh nempa sejarah basitak nya, parti nya tetap idup, ku iya.

“SUPP ngembuan sejarah ba sitak nya kenyau ari kelia, sebuah parti ke mayuh sejarah sereta adat, ke bisi tuju. Kitai enda ulih munuh parti ti ngemerat rayat baka nya aja,” ku iya.

Dalam kandang berapa taun tu ke udah, mayuh pemansang udah digaga di Batu Kawah, nyengkaum ngaga jalai besai agi,pun kayu ke ngachau jalai pan mayuh udah ditebang sereta pemansang bukai.

“Nengah Perintah, kami bisi ‘Touched Points Projects’, ke alai Perintah meri ungkup geran ngagai kami dikena ngaga pemansang dikena mantu rayat ba sitak nya. Ambika chunto, ngemesaika parit ngambika enda ampuh bah,” ku iya.

Nengah RTP ( Program Transformasyen Menua) ti dikemendarka Kepala Menteri ngagai SUPP bedau lama tu tadi, nengah Majlis Perbandaran Padawan (MPP), nyauka RM2 juta dikena ngaga projek pemansang,” ku iya seraya nandu barumadahka ba taun 2016, mayuh agi belanja RTP deka diberi ngagai SUPP ngambika bisi dikena ngaga pemansang dia.

Kelimpah ari nya, Lo ngarapka Perintah Besai nengah Opis Menteri Rampa Menua, Pengeraja Asal (Datuk Wan Junaidi Tuanku Jaafar) deka meri mayuh agi belanja ngagai SUPP baka ke udah dikena mantu Bandaraya Miri.

“Belanja tu mayuh agi dikena ngaga parit ngambika kandang endur dalam sitak nya enda kena ampuh bah ngenyit. Aku ke nyadi injinir sivil, berat deka ngemanahka agi Perambu Sistem Entali Ai Besai dikena nyeliahka sitak nya, Kuching sereta serata menua ari kena tasah ampuh bah.

“Kuala Lumpur kala kena tasah ampuh bah ke balat tang enda agi diatu laban Projek Nyeliahka Ampuh Bah ti digaga sida di semenanjung udah jauh manah enti dibanding enggau di Kuching. Baka di Kuching, tasah ampuh bah majak balat,” ku iya seraya madahka Perintah Besai anang semina ngambi luyar aja nyadi pengari rayat tang mega ngambi injinir.