Nengeri tu begunaka kapal moden kena pakar bejalaika pansik marin, ku Jabu
KUCHING: Berindik ari peminta sebuah kapal pemansik baru ari perintah besai apin dikemujur, nengeri tu puntan bejalaika pansik ngena kapal marin KK Manchong laban enda disikap ngena teknologi moden.
Sapit Kepala Menteri Datuk Patinggi Tan Sri Alfred Jabu anak Numpang madah, KK Manchong enda dikena kandang lima taun ke udah lalu diatu nginjau kapal SEAFDEC 2 kenyau dua bulan ke udah, ti bepalan di Bangkok, Thailand.
“Kitai endang begunaka kapal baru kena nganti KK Manchong ngambika pansik pasal pemisi ikan muntang dipejalai lebih agi nebing tasik tauka sungai besai nengeri tu ke ditemu mayuh ikan sereta marin bukai enti dibanding enggau di Semenanjung Malaysia,” ku Jabu.
Iya madah munyi nya ba aum media di dewan Maritime di Muara Tebas ditu, ensana, pengudah nemuai ngagai tasik menua tu ngena kapal Maritim ti bela disempulang raban media, Sekretari Mendam Opis Menteri Betanam Betupi Moden (KPS) Prof Datu Dr Ngenang Janggu, Direktor Opis Pengawa Betanam Betupi (JPS) Datu Lai Kui Fong, Kaban Parlimen (MP) Mas Gading ti mega Sapit Menteri Pengawa Betanam enggau Asas Tani Anthony Nogeh, Direktor Opis Berikan Sarawak (JPLS) Belayong Nyuak enggau Kepala Maritim Sarawak First Admiral (M) Ismaili Bujang Pit.
Nengeri tu begunaka kapal baru nganti KK Manchong ngambika pengawa pansik ulih dipejalai enggau efektif agi.
“Kitai udah nganjung peminta ari perintah besai tang nganti KK Manchong tang apin bulih. Tang ari randau aku begulai enggau Menteri Betanam Betupi enggau Asas Tani Datuk Seri Shaberry Chik enggau Kepala Menteri Datuk Patinggi Tan Sri Adenan Satem apin lama ke udah, Shaberry nyukung peminta nengeri tu nganti sebuah kapal pansik maritim ke moden nganti KK Manchong,” ku iya.
Jabu ti mega Menteri Pemansang Menua Pesisir madah, ngena kapal pemansik baru nya ila nginau pengaya tasik ba sitak EEZ ( Zon Ekonomi menua tu).
Kapal nya deka disikap ngena perengka moden ngambika ulih dikena mansik Terumbu Layang Layang, nyengkaum dikena ngaga pansik ‘Oceanography’, ‘Demersal’ nyengkaum ‘Pelagik’ endur beratika pemayuh ikan sereta ‘pattern migratory’ ikan ke mansa serta dalam EEZ nya.
Naka diatu, Sarawak nginjau SEAFDEC 2 ti bepalan di Bangkok, Thailand, disuwa enggau ungkus RM1.4 juta dalam dua bulan ke udah.
Kapal SEAFDEC 2 disikap ngena mayuh macham perengka guna moden ‘state- of- the- art’ ke ulih ngaga pengawa pansik pasal pendiau maritim di tasik menua tu.
Kapal SEAFDEC 2 disuwa Perintah Menua Malaysia ngambi bisi dikena bejalaika pansik marin nebing tasik ba kededua nengeri Sabah enggau Sarawak.