Penyampau taun ngintu pengerami Hari Merdeka diperambu nadai disebut agi
KUCHING: Pengerami Hari Merdeka diperambu deka diintu enda nyebut penyampau taun tiap kali pengerami nya diatur belabuh taun seiti nyin ila, ku Menteri Komunikesyen enggau Multimedia, Datuk Seri Ahmad Shabery Cheek, ditu kemari.
Iya madah perambu nya udah dibai ngagai Kabinet empai lama ke udah dikena nyeliahka rayat di nengeri Sabah enggau Sarawak ngasaika diri dikelaung nyema penyampau taun ngintu pengerami nya disebut.
“Ambika chunto (Pengerami Hari Merdeka) taun ke57, orang Sarawak deka madahka (pengerami) nya nadai besangkut paut enggau kami. Kami merdeka begulai enggau Malaysia maya taun 1963 (lalu pengerami) nya beguna,” ku iya.
Iya madah munyi nya rambau aum pengarang berita begulai enggau Menteri Pengeraja Asal enggau Rampa Menua Sarawak, Datuk Amar Awang Tengah Ali Hasan pengudah seduai iya bela ngaga penemuai bansa nuju Kepala Menteri Sarawak, Tan Sri Adenan Satem ba Begunan Kunsil Negeri ditu, kemari.
“Kami merambu ngambika pengawa nyebut (pengerami) Hari merdeka nya semina ( enggau) disebut kitai Pengerami Hari Merdeka 31 Ogos. Nya aja,” ku iya.
Ahmad Shabery madah, iya udah ngemansutka langgur penemu nya ngagai Adenan rambau pengawa meri penemuai basa lalu minya ngambika bisi bulih timbal ari rayat Sarawak.
Iya madah perambu nya dipeda chara ke dikena orang ba menua bukai ngintu hari merdeka baka di menua Amerika Syarikat ke semina nyebut “the 4th of July Celebration” taja pan ari sukut sejarah, nengerinengeri ke dipegai iya nyadi menua merdeka ba haribulan ke bebida.
Iya madah naka ke diatu iya udah bulih timbak ke manah ari perintah nengeri Sarawak sereta sekeda ketuai di nengeri tu lalu ngarapka bulih timbal ke sebaka ari ketuai enggau rayat Sabah.
Berebak enggau nya pengerami ngintu Hari Malaysia ninting 16 September nyangka enda dikemadu laban haribulan nya ngembuan kebuah ke diri empu.
“Aku enggai meda maya bisi ngintu pengerami besaibesai Hari Merdeka ke suah diatur di
Kuala Lumpur, nyau baka ngelaungka sejarah Sabah enggau Sarawak laban kitai nandu nyebut penyampau taun,” ku iya. — Bernama