Semua pupu bansa bela ampit ngisi pengawa puang ba SCORE
BINTULU: Perintah enda kala ngelaungka semua pupu raban bansa ba nengeri tu dalam ngemansangka diri enggau meri sida peluang ngisi pengawa puang ke bisi disediaka setipak enggau penau sida kelebih agi ba Koridor Kuasa Ulih Dikena Baru Sarawak (SCORE).
Menteri Muda ba Opis Kepala Menteri ( Promosyen Pelajar Teknikal) ke mega nyadi Chairman Tabung Ekonomi Gagasan Anak Bumiputera Sarawak (TEGAS), Datu Len Talif Salleh madah, chara perintah ngemansangka rayat ba nengeri tu ukai baka ‘ kepayang ngadaka dilah’ tauka semina maya bepilih aja, tang perintah amat nulung rayat enggau ati ti mentas enda ngira bansa enggau pengarap.
Berindik ari nya, semua bansa di nengeri tu diberi peluang sama ngemansangka diri sampai ngagai tikas ke pemadu tinggi kelebih agi ba bidang ekonomi.
“Enti perintah semina meri peluang pengawa ngagai seiti bansa aja, tentu bansa bukai deka ringat lalu enda puas ati. Nyadi enggau nya perintah meri peluang pengawa tu ngagai semua pupu raban bansa sereta nyendiaka mayuh agi peluang dikena nulung rayat ngemansangka menua tu,” ku iya. Iya mansutka penemu nya lebuh ti bejadi Seminar Latih Vokasional enggau Pelajar Teknikal ( TEVT) Nembiak Menua Baram ba Hotel Kemana kemari.
Menteri Muda Rampa Menua nya madah, ngambi ke chunto menua Baram ke dikemansangka dikena ngaga palan kuasa hidro, tang bisi mega orang enda rindu ke pengawa nya.
Taja pia, Len madah kitai patut meda seiti menua, nengeri tauka kandang menua mupuk mansang ngagai seiti tikas ke jauh lebih manah berindik ari ekonomi ti mujur.
Teknologi Injin ke digaga ukai semina diguna ungkup ke 20 tahun, tang deka diguna sampai beratus taun. Ngambi ke chunto ba menua Norway enggau Republik Czech, teknologi tu endang sigi udah lama diguna kenyau ari 50 tahun ke udah sereta ulih nulung ngemansangka menua sida.
Tang ba menua kitai, en- dang udah dipansik pengelikun iya sereta dipeda ulih ngenataika pemisi menua ba timpuh ke lama sereta ulih ngemansangka menua Baram.
Kelimpah ari nya, Len mega madah sebengkah endur di menua tu enda ulih mansang enti nadai utai dikemujurka kelebih agi ba pemansang ekonomi.
Iya mega madah, pemansang kuasa hidro di Baram ulih mansang enggau manah sereta ulih nge- mansangka Industri Dagang Temuai laban menua nya sigi kaya enggau penatai ai ujan ke ngerikod sampai 2,000 milimeter sampai 3,000 milimeter setaun.
Pemayuh nembiak menua Baram ke bisi enggau ngulu seminar ke berengkah maya 3 September tu tadi bisi 105 iku. Sama mega bisi datai dalam seminar nya, Ketuai Pemesai Eksekutif Palan Latih Proaktif ke bepalan di Kuching, Dato’ Seri Dr bernard HK Tan Abdullah. MIRI: Seiku lelaki diukum Kot Majistret RM1,000 tauka dijil sebulan laban ngembuan penyalah bejalaika pengawa dagang muka kedai judi online enggau nadai belisin.
Ukum nya digerah Majistret Lovely Natasha Charles pengudah lelaki ke dituduh, Mazelan Ahmad, 42, ari Piasau Link ditu ngaku diri salah bepelasarka penyalah iya ke udah dibacha nitihka Seksyen 5 (2) Ordinan Hiburan 2001.
Nitihka penyalah tu mega, lelaki nya ulih ditinggang ukum enda ngelui RM20,000 tauka dijil enda ngelui lima tuan tauka kededua bengkah ukum nya, nyema nyengala salah.
Bepelasarka penerang kes, lelaki nya gawa nyaga palan pemerindang lalu ditemu bejalaika pengawa dagang muka kedai judi online nadai belisin.
Lelaki nya didawa ngereja penyalah nya pukul 9.15 malam, 22 Ogos tu tadi ba ringkat baruh sebengkah kedai di Krokop 8 ditu.