Seliahka penyakit kemi manis
Penyampau kes orang biak ngidap kemi manis nambah 25 peratus ba taun 2011, ku Noor
KUCHING: Pansik ke dipejalai ba 2011 di Malaysia mandangka penyampau kes orang ke agi biak beumur 18 taun ditemu ngidap penyakit kemi manis nambah 25 peratus.
Ketuai Direktor Opis Pengerai (KKM) Datuk Dr. Noor Hisham Abdullah madah enti penyakit nya enda diintu enggau manah, tau bendar ngujungka kaki orang ke ngidap kena tetak.
Lebuh beratika pemerat nya, iya netapka chara pemadu engkeman dikena ngelaban keruga penyakit kemi manis iya nya nengah chara nyeliah diri ari kena rampit.
“Semua kitai patut mereti keruga penyakit kemi manis lalu sakit nya patut diseliah.
“Enti bisi telih, aku ngalau orang ke ngidap penyakit kemi manis berubat enggau lengkas. Anang ngelakka sakit nya nyau raya lalu ngujungka kaki kena tetak.
“Ungkus ngubat penyakit tu mega deka majak mar enti dilak kelalu lama alai tiap sepital ngembuan chara merubat telih orang ke ngidap penyakit kemi manis,”ku iya.
Iya mansutka jaku nya ba seiti aum pengarang berita pengudah bejadi “TransBorneo Wound Congress 2014’ ke diatur di sebengkah hotel tebilang ditu, kemari.
Ngenang senentang forum ke diadu tiga hari berunggu berengkah kemari nyentuk 17 Ogos tu, Noor Hisham madah program renggat entarabansa nya mandangka
“
Enti bisi telih, aku ngalau orang ke ngidap penyakit kemi manis berubat enggau lengkas. Anang ngelakka sakit nya nyau raya lalu ngujungka kaki kena
” tetak. Datuk Dr. Noor Hisham Abdullah Ketuai Direktor Opis Pengerai
teknik baru merubat telih ke bekaul enggau mayuh macham penyakit.
Ku iya, raban misi, lutur enggau orang ke landik ba pengawa berubat patut nyereta program nya awak nambahka penemu sida sentang teknik baru merubat telih.
‘Forum ke diadu tiga hari berunggu tu deka ngangkatka ikas pengawa berubat telih di menua tu. Penau tau dikunsi entara raban penyereta senentang chara merubat telih kelebih agi ba raban orang ke ngidap kemi manis.
“Ungkus berubat seruran nambah, nengah forum tu kitai nyadang ulih beratika sekeda perengka ke dikemisi lalu ulih dikena ngurang ungkus,”ku iya.
Program “TransBorneo Wound Congress 2014’ digulu 500 iku deligit ke datai ari 20 bengkah menua lalu nungkatka rambai jaku “Agi Idup Agi Ngelaban’.
Diatur Malaysian Society of Wound Care Proffesionals (MSWCP), program nya mandangka mayuh bengkah teknik berubat ke baru ungkup mensia mayuh ke deka nemu enggau silik.
Bela datai Chairman Pengatur Pengawa ke mega Presiden MSWCP Dr. Harikrishna K.R Nair enggau Direktor Sepital Besai Sarawak (SGH) Dr. Chin Zin Hing.