Momuruan om puru Umno pokionuon misompuru
TAWAU : Toinsanan momuruan om puru Umno id potitikid bogian pokionuon popoinsomok do nuludan om misompuru montok popogirot do parti dilo.
Kumoduo Boyoon Umno Bogian Tawau, Datuk Seri Panglima Syed Abas Syed Ali minoboros do papaharo do kopongunsuban dilo montok papatantu do Umno toririmo mongumolig timpu tabantalan rayat om kaanu nogi popoingkawas do sokodung rayat kumaa Barisan Nasional (BN).
“Alansan kopio oku kumaa toinsanan bogian kaamung momuruan ih nokoumbal minongigit Umno bogian diti miiso sabap ngaran parti diti.
“Kada haro pisingkiwalan oiyo kotokou om lobi miiso montok papatantu do timpu tabantalan tanak manangaki tokou kijominan,” ka dau.
Minanahak boboroson id Abaabayan Pirubaan Songowian Momuruan Mogigion Bogian P.190 Tawau hiti. Nokotindapou nogi ih Timbang Boyoon Umno Datuk Hj Nizam Abu Bakar Titingan.
Minoboros Syed Abas do Umno Bogian Tawau ogumu noh pinapanau do kaparagatan id watas diti asil karaja Boyoon Bogian Umno Tawau Datuk Hj Tawfiq Abu Bakar Titingan om toinsanan injin idsuang parti.
Ka dau, laang diti kiguno kopio potilombuson mantad timpu doid iso timpu lobi-lobi kagu montok tumoguang pomilian tagayo di au noh alaid.
Kawagu dau, toinsanan injin Umno id watas dilo mositi tumilombus minggisom kumaraja montok mamagayat ginawo rayat om nogi papagaras do sokodung kumaa BN ontok pomilian tagayo timpu rumikot.