Ii avasi do kinongoon, alaat do intongan

TUHUN ngaavi nopo, ii kivaa do kotumbazaan (adat, ugama), nga ingkuo po nga lumonggivit (umogot, gumiot) doid nunu ii dau do kotumbazaan (adat, ugama). Om noboos do ‘aiso i do ugama (adat, kotumbazaan) do mongia do au avasi,’ ka. Avasi kozo iho do oongou. Iho no o kagazat do tuhun ngaavi, tu tuhun ngaavi poingimatu nopo nga mimang di tangavasi.

Poinsuat id buuk ‘pinosuatan do kobituahan om tongobitua’ do “Vinangun di Kinoingan o nunu noopo ii vinangun dau, miampai tuddu om padaamaan tangavasi; kavangun nopo disido ii nga intangai no dau om otopot do angavasi ii. Kilati iho do mimang i Kinoingan do angavasi kozo ii vinangun ngaavi dau.

Nga, nookuo tu nung intangan om piumonon dotokou do baabaino, nga ogumu i ii au avasi.’ Nookuo ma?’ ka dotokou do momusoou. Dadi soizukon nodii dotokou do nookuo. Ontok monoizuk tokou, oduhompitan dotokou do momuondom ii mantad po di tinimpuunon i.

Abasa mai dotokou do o’oitan i ‘logon’; Nopipihadan i ‘logon’ do asanang kozo ii tuhun kumoiso nogi, ii pinoizon di Kinoingan do id iso tizonon do kasangan, om vagu, mimang i logon do aaha dau i Kinoingan. Om omungkang o ginavo dii tuhun; nga mimang ponogi isido do kotopong toi kaahib di Kinoingan.

Mantad diho do oloolotian dotokou do ‘nokoumbak do tuhun o kapapahad om kolsumbungan’ Om ii douso di ‘tasab tangalaat’ nga kapapahad om kosumbungan nogi. Ii douso di Cain nga kapapahad nogi miampai do kababaazat om kohohodong.

Om douso ngaavi do tuhun ngaavi guuguhu nga kisuang nogi do ‘kapapahad, kohohodong, kababaazat, kosumbungan (akakatkogiiginovoo, kinakat-ginavo); om magakup-akup, mongkisoosoibau, tamaha; om ogumu po o douso suvai.

Dadi, nung nakapapaatu do tuhun iho douso ngaavi nokomoi; kapapahad, kababaazat, kohohodong, katamaha, ginavotakakat, akakat kogiiginovoo, mudizo tokou nodii dotikou sondii do : Kakal podii naku do kivaa tuhun do gumompi diho douso ngaavi di ‘logon’?

Om ondomon nodii dotokou iho susui mantad tinimpuunon i; om mantad diho do soovon (pomusaavan) nodii dotokou do nunu o vaza diho douso ngaavi; nokoimang naku doid dotokou iho. Soovon, soovon om soovon kozo dotokou; kotutuk dati do miaga ditia ii osoou dotokou: Avasi do kinongoon, alaat do intongan om koimang om piumonon.

“Tai Kivaa no kozo do kopoguangan tu id kosusaan i iti kinoikoto dotikou. Iti nodii bogia do: kivaa mogiimpihadan, kivaa gumompi do kababaazat kohohodong, kosumbungan, kinakat-kogiiginovoo, ginavo takakat, tamaha, magakup-ukup, monoiso, momitana, mogohimut, om ogumu po ‘negative’ suvai, ka dii id tosoou.

Dadi nung otopot iho tosoosoou, nunu nodii o vaza diho doid dotokou do baino? Intangan nodii dotokou o kinoikookoto, kinobuuon, kinokoozo etc. Nung kikopoguangan, nunu nodii o maan. Nung kosontob ginavo,tu komozon do avasi kozo o kinoikookoto, nunu nodii ii poguangan om nunu nodii ii miho komozon do ‘kosontob-ginavo’?

Pomusaavai no poogi dotokou: Nung kivaa dii ‘kopongumbak’ nga potoodo no ii om iduo no ii. Nung kivaa do kinomungkangan nga gontiai no ii do vinakas; om nung alaat ii vaza tavagat kozo iti. Nga miampai pomusaavan tavakas, oivang tomoimo o lahan; potimpuuno no o surga id diti poomogunan naamot. Poingkuo om ingkuo daa? Pomusaavai!