PAC mositi mindahu gana
# Potontuon tusin tulun ginumuan gunoon tumanud tujuan tototopot
KOTA KINABALU: Komiti Mongingintob Tusin Pogun ( PAC) id pointongkop pogun pokionuon mindahu gana montok mongintong kinoingkokoton projik di pinapanau, om nogi papatantu do tusin pogun gunoon montok tujuan ino do pinolulus.
Boyoon Montiri Sabah Datuk Seri Musa Aman minoboros do bogian haro kopontingan tantu noh do lobi kotumboyo sokiro ko puru PAC maganu koinsomokan irad dilo.
“Koubasanan mindahu gana kaanu monulung tokou mongintong sondiri projik om abaabayan porinta mooi ino otootopot papanaon, om asil dilo korikot kumaa rayat om asil dilo kaanu momodimpot miagal di napalan.
Idsuang ahal diti, kiguno kopio montok PAC papatantu do koponguhanan abaabayan tusin pogun kapanahak koulian tosonong kopio, aiso pomirubatan, kowosuon om ponombirangan,” ka dau.
Noboros di Musa ahal dilo ontok pinotimpuun do seminar PAC SeMalaysia 2017 kitulu ‘Popoingkawas Kinangaian Monorina Karaja’ hiti koniab.
Teks pason disio binasa di Montiri KarajKaraja Poimbida Sabah Datuk Teo Chee Kang. Nokotindapou nogi ih Ponorikohon PAC Malaysia Datuk Seri Hasan Arifin om Ponorikohon PAC Sabah Datuk Hj Ahmad Hj Bujang.
Seminar sangadau dilo, ih pinanjur do PAC, Koupisan Audit Pogun om Lamin Koundangan Pogun Sabah, notindapou di 420 tulun miampai tujuan papawakas tonggungan PAC suai minsingubas om popogirot do pironitan (integriti) om ‘akauntabiliti’ sektor tulun ginumuan om komponi kikoompitan porinta.
Minoboros Musa do PAC kiguno kopio mongintong tototopot om poposiliu do Ruputan Luguan Audit Pogun sabaagi sukuon montok monginsonong kolomion idsuang koupisan toiko agensi porinta kaamung noh ahal kousinan om kaparagatan.
Alansan kopio isio tuh koinsanai kolomion noulit di nungkit idsuang ruputan dino nokomoi osiliu pongintongan tototopot kumaa PAC mooi ino osiliu pangajaran om pambalajaran montok koupisan om agensi porinta.
Tumanud dau tonggungan PAC kiguno kopio montok monulung popoingkawas do kinangaian tosonong monorina karaja suai ko sumiliu mato om tolingo porinta montok papatantu do rayat asantaban ginawo nokomoi ningkokoton kapanahakan kotorinaan porinta.
“Baino, rayat maid- laid koilo om haro ‘ ekspektasi’ takawas nokomoi kosonongon kapanahakan porinta. Mantad dilo, kiguno kopio montok tumilombus popoingkawas do kotumbayanan rayat miampai papatantu do injin ponorinaan ‘efektif’ om ‘efisien’.,” ka disio.